პოლიტიკა

ჯაფარიძესა და სუბელიანს საშუალება ჰქონდათ შეხვედროდნენ ერთმანეთს და დაელაგებინათ გარკვეული ტიპის საკითხები - სულხან სალაძე კობახიძის ნებართვაზე

„ახალგაზრდა იურისტთა ასოციაციის“ თავმჯდომარემ სულხან სალაძემ „სერიოზულ პრობლემად“ შეაფასა პროკურატურის ყოფილ მაღალჩინოსან, მირზა სუბელიანთან ციხეში დეპუტატ ვიქტორ ჯაფარიძის 14 ოქტომბერს დაფიქსირებული შესვლა.

სალაძის განმარტებით, ეს პრობლემას წამოადგენს იმ თვალსაზრისით, რომ „ორ სხვადახვა მოწმეს საშუალება ჰქონდა, შეხვედროდა ერთმანეთს და დაელაგებინა გარკვეული ტიპის საკითხები“.

კითხვები ჩნდება იმასთან დაკავშირებითაც, რატომ არ გამოაქვეყნა პროკურატურამ სუბელიანისა და ჯაფარიძის ჩანაწერები 16 ოქტომბრამდე, თუკი ფარული მასალების შესახებ მათთვის ცნობილი 12 ოქტომბერს გახდა და გამოძიებაც ამ დღეს დაიწყო.

„სერიოზული პრობლემა არის ის, რომ 14 ოქტომბერს გაცემულია თანხმობა ვიქტორ ჯაფარიძის სახელზე შესულიყო საპატიმრო დაწესებულებაში და ბატონი სუბელიანი მოენახულებინა. თავისთავად, პრობლემა ის კი არ არის, რომ ეს თანხმობა კვირა დღეს არის გაცემული და კვირა დღეს შედის ბატონ სუბელიანთან. თეორიულად, შეიძლება კვირა დღესაც იყოს თანხმობა გაცემული, თუმცა პრობლემა არის ის, რომ უკვე პროკურატურისთვის ცნობილი იყო და დიდი ალბათობით, პარლამენტის თავჯმდომარისთვისაც, რომ ამ ჩანაწერში ფიგურირებდა ბატონი ჯაფარიძე. ბატონი ჯაფარიძე და ბატონი სუბელიანი ყველაზე მნიშვნელოვანი მოწმეები არიან იმ საქმეზე, რაზეც წესით გამოძიება უნდა იყოს ჩატარებული და რეალურად, ორ სხვადახვა მოწმეს საშუალება ჰქონდა, შეხვედროდა ერთმანეთს და დაელაგებინა გარკვეული ტიპის საკითხები, რომელიც შემდგომში შესაძლოა, გამოძიებისათვის ყველაზე სასურველი ვერსია იყოს“, - განაცხადა სალაძემ.

„ლიბერალისა“ და On.ge-ის მიერ საქართველოს პარლამენტიდან გამოთხოვილი საჯარო დოკუმენტაციის მიხედვით, საქართველოს პარლამენტის თავმჯდომარემ ირაკლი კობახიძემ დეპუტატ ვიქტორ ჯაფარიძეს გლდანის მე-8 პენიტენციურ დაწესებულებაში ბრალდებულ მირზა სუბელიანთან მონახულების ნებართვა 5-ჯერ მისცა, აქედან ერთ-ერთი იყო გაცემული კვირას, რუსთავი 2-ის გადაცემა P.S.-ის ანონსის ეთერში გასვლის შემდეგ.