პოლიტიკა

დისკუსიას მაშინ ექნება აზრი, როცა პარლამენტიდან გამოწვეული იქნება კონსტიტუციის არსებული პროექტი - გიორგი აბაშიშვილი

პრეზიდენტის ადმინისტრაციის ხელმძღვანელი, გიორგი აბაშიშვილი გამოეხმაურა პრემიერ-მინისტრის განცხადებას, რომლის თანახმად, სამთავრობო გუნდი მზადაა, საკონსტიტუციო ცვლილებებთან დაკავშირებით დიალოგი გააგრძელოს.

აბაშიშვილის თქმით, დისკუსიას მარტო მას შემდეგ ექნება აზრი, რაც პარლამენტიდან კონსტიტუციის პროექტი იქნება გამოთხოვილი.

„კონსტიტუციურ საკითხებზე რეალური კონსენსუსის უზრუნველსაყოფად, უპირველეს ყოვლისა, საჭირო, აუცილებელი, მნიშვნელოვანი და გადამწყვეტია, შეჩერდეს ან გამოწვეული იქნას პარლამენტიდან კონსტიტუციის არსებული პროექტი. შესაბამისად, ამის შემდგომ აქვს აზრი დისკუსიას და ამის შემდგომ, შესაძლოა, გაჩნდეს კონსენსუსისთვის გარკვეული ტიპის რესურსები.

შეუძლებელია, საქართველოს კონსტიტუცია, თანხმობის დოკუმენტი მიღებული იყოს ერთპარტიულად. ეს ვერ იქნება ვერანაირი ლეგიტიმაციის მატარებელი. ჩვენ უნდა გავითვალისწინოთ, რომ ჩვენ ვიღებთ საქართველოს კონსტიტუციას, რომელიც საქართველოს მოქალაქეებისთვის არის და არა ერთი რომელიმე პოლიტიკური პარტიის წესდებისთვის“,- განაცხადა აბაშიშვილმა.