პოლიტიკა

დიმიტრი გელოვანები უნდა მოვძებნოთ - ნათია კუპრაშვილი

დიმიტრი გელოვანები უნდა მოვძებნოთ და უნდა ისინი დაგვთანხმდნენ, რომ ქვეყანას სჭირდება დახმარება მართლმსაჯულების სისტემაში, - განაცხადა აღმოსავლეთ პარტნიორობის სამოქალაქო საზოგადოების ფორუმის საქართველოს ეროვნული პლატფორმის თავმჯდომარემ ნათია კუპრაშვილმა უზენაესი სასამართლოს თავმჯდომარეობის კანდიდატის შერჩევის მიზნით პრეზიდენტის ადმინისტრაციის წარმომადგენლებსა და ეროვნული პლატფორმის წევრებს შორის შეხვედრის შემდეგ.

მისივე თქმით, უზენაესი სასამართლოს თავმჯდომარეობის კანდიდატი მართლმსაჯულების სისტემისგან გარეთ მდგომი პირი უნდა იყოს.

„ვსაუბრობთ ადამიანზე, რომელიც იქნება გავლენებისგან თავისუფალი, პროფესიონალი თავისი საქმის. თქვენ იტყვით, რომ ვეძებთ დიმიტრი გელოვანს. რამდენიმე დიმიტრი გელოვანი მახსენდება. ამ ქვეყანას აქვს პოტენციალი, უბრალოდ დიმიტრი გელოვანები უნდა მოვძებნოთ და ისინი უნდა დაგვთანხმდნენ, რომ ქვეყანას სჭირდება დახმარება მართლმსაჯულების სისტემაში და მოკიდონ ამ პასუხისმგებლობას ხელი.

მთავარი კრიტერიუმი, რომელზეც საუბრობდა დღეს აქ წარმოდგენილი საზოგადოება, არის, რომ არ უნდა იყოს სისტემის მხრიდან გავლენები, ანუ მოსამართლეები არ გვინდა. ეს რომ არის მთავარი კრიტერიუმი, აჩვენებს მართლმსაჯულების კრიზისს. ასევე, ვსაუბრობთ იმაზე, რომ პოლიტიკური გავლენებისგან თავისუფალიც უნდა იყოს. მთავარი ამოცანა მაინც არის, რომ ჩვენ როგორმე დავაზღვიოთ ქვეყანა შიდასისტემური კლანური გავლენებისგან და კორპორატიული გავლენებისგან",- განაცხადა კუპრაშვილმა.

მისი თქმით, ეროვნული პლატფორმის ძალისხმევა იქნება მიმართული იმისკენ, რომ კონსტრუქციული თანამშრომლობა შედგეს უმრავლესობასა და პრეზიდენტის ადმინისტრაციას შორის, რომ მოქმედი წესით მოხდეს თავმჯდომარის არჩევა.

ეროვნული პლატფორმა კანდიდატის შესარჩევად ღია კონკურსის გამოცხადებას მხარს არ უჭერს.

ნინო ექვთიმიშვილი