პოლიტიკა

დღევანდელი ხელისუფლების მოსვლაში თქვენი წვლილიც დიდია - ნიკა რურუამ დიანა ტრაპაიძე მიკერძოებაში დაადანაშაულა (ვიდეო)

„მიუკერძოებელ ჟურნალისტს ნუ თამაშობთ, ასეთი ნამდვილად არ ხართ“, - განაცხადა „ერთიანი ნაციონალური მოძრაობის“ ერთ-ერთმა ლიდერმა ნიკა რურუამ ტვ პირველის ეთერში, დიანა ტრაპაიძის „დღის ამბებში“ სტუმრობის დროს.

პოლიტიკოსის გაღიზიანებამ ტრაპაიძის კითხვამ გამოიწვია, რომელიც ეხებოდა პარტიის მიერ არჩევნების მეორე ტურში მონაწილეობაზე უარის თქმას.

„უნდა მიეტოვებინა თუ არა თავისი მხარდამჭერები მეორე ტურის წინ ნაციონალურ მოძრაობას? შეიძლება, ასეც აიხსნას თქვენი პარტიის გადაწყვეტილება?“, - ჰკითხა წამყვანმა რურუას.

ენმ-ის წევრმა კითხვა პოლიტიკურად ანგაჟირებულად ჩათვალა.

„ეს ცხადია თქვენი ინტერპრეტაციაა, რომელიც, პირდაპირ ვთქვათ, არაა კეთილგანწყობილი, იმიტომ რომ ჩვენს გადაწყვეტილებას ცუდ შუქში წარმოაჩენს“, - უპასუხა რურუამ.

ვითარება სტუმარსა და წამყვანს შორის მაშინ დაიძაბა, როცა ტრაპაიძემ შემდეგი კითხვა დასვა: „იქნებ, ამ ლოგიკით, საერთოდ არ მიგეღოთ მონაწილეობა არჩევნებში. მე არ მიყვარს ნიჰილიზმი არჩევნების მიმართ, მაგრამ ასეთი ლოგიკური შეკითხვა ჩნდება“.

საპასუხოდ რურუამ ჟურნალისტი მმართველი გუნდისადმი სიმპატიაში დაადანაშაულა.

„არაა ეს ლოგიკური შეკითხვა, ეს პოლიტიკური შეკითხვაა, თქვენ პოლიტიკურად ცდილობთ წარმოაჩინოთ ეს მმართველი პარტიის სასარგებლოდ.

დღევანდელი ხელისუფლების მოსვლაში თქვენი წვლილიც დიდია“, -დაამატა რურუამ.
ტრაპაიძემ შენიშვნა უარყო.

„<...> ყოველთვის ვზრუნავ , რომ ჩემი ეთერი დაბალანსებული იყოს და ასეთ შენიშვნას, როგორც ჟურნალისტი, არ მივიღებ“, - უპასუხა ჟურნალისტმა ნიკა რურუას.

ანა მებურიშვილი