პოლიტიკა

დღეს თუ ბიძინა ივანიშვილის ხელში აღმოჩნდება ყველა თანამდებობა, მაშინ ახალი 7 ნოემბერი იქნება, შეიძლება უფრო სასტიკიც - ლევან ბერძენიშვილი

2007 წლის 7 ნოემბრის მოვლენების მონაწილის, „რესპუბლიკური პარტიის“ ერთ-ერთი ლიდერის, ლევან ბერძენიშვილის განცხადებით, რუსთაველის გამზირზე განვითარებული მოვლენები „ქართული ოცნების“ მთავრობას ბოლომდე არ გამოუძიებია.

მისივე თქმით, „ქართულ ოცნებას“ არ აწყობს გამოძიების ბოლომდე მიყვანა, რადგან ყველამ იცის, ვინ სად იდგა და ვინ ვის აფინანსებდა. ბერძენიშვილმა ხაზი გაუსვა „ქართული ოცნების“ თავმჯდომარის, ბიძინა ივანიშვილის შესაძლო კავშირს ამ მოვლენებთან

„7 ნოემბერი ბოლომდე არ გამოიძია და არ გამოარკვია "ქართულმა ოცნებამ" იმ უბრალო მიზეზის გამო, მან გადასარევად იცის, ვინ სად იყო მაგ დროს, ვინ ვის უჭერდა მხარს და ვინ ვის აფინანსებდა. თუ ვინმეს ჰგონია, მე დამავიწყდა ბიძინა ივანიშვილის ნათქვამი, რომ მე გადავუხადე იმას იმდენი, ვანოს ის მივეცი, ეს არ დაგვავიწყდა. მოკლე მეხსიერება არის ყველაზე მძიმე რამ, რაც ხდება.

მე მაგალითად, ჩემი გამოსვლა, რომ არ აპატიებს ქართველი ხალხი ამას - არ დამავიწყდა, მაგრამ მივხვდი არჩევნების შედეგებით, 600 ათასი ხმით, რომ ქართველმა ხალხმა 11 წლის შემდეგ თქვა, ვაპატიე იმ მოტივით, რომ არ მინდა განმეორდეს, იმიტომ, რომ დღეს თუ ბიძინა ივანიშვილის ხელში აღმოჩნდება ყველა თანამდებობა და ყველაფერი, მაშინ ახალი 7 ნოემბერი იქნება, შეიძლება უფრო სასტიკიც“, -თქვა ბერძენიშვილმა.

ბირძენიშვილის თქმით, საზოგადოება „ქართულ ოცნებას“ სჯის უმოქმედობის გამო.

„მე ვთქვი ასეთი რამ, რომ ქართველი ხალხი მიხეილ სააკაშვილს ამ დანაშაულს არ აპატიებს, მაგრამ მე შევცდი, იმიტომ რომ ყოველთვის, როცა ლაპარაკობ ხალხის სახელით, ძალიან ფრთხილად უნდა იყო, იმიტომ რომ ამ ქართველმა ხალხმა 11 წლის შემდეგ, მიუხედავად იმისა, რომ მშვენივრად იცის, რა მოხდა 7 ნოემბერს და ამას ვერავინ ვერ ამართლებს, ამას ვერ ამართლებს ვერც სააკაშვილი, რა თქმა უნდა, საპრეზიდენტო კანდიდატის განცხადება ნანახი გაქვთ. გასაგებია, რომ ამის გამართლება შეუძლებელია, მაგრამ აპატიებს თუ არა, ეს არის კიდევ სხვა საკითხი, როცა ადამიანი აღიარებს, რომ შეცდა და ბევრი რამ არის კიდევ.

და როდესაც სხვა ხელისუფლება მოვიდა, რომელიც 6 წელია ხელისუფლებაშია და ვერაფერი ვერ გააკეთა, გარდა იმისა, რომ ლაპარაკობს იმ ცხრა წელიწადზე. ხალხი ეუბნება მშია - ის ეუბნება 9 წელი. ხალხი ეუბნება უფლებებს მირღვევ - ის ეუბნება 9 წელი, კაცი ეუბნება შვილი მომიკლეს მკვლელი მიპოვეთ-ის ეუბნება, არ შეადარო გირგვლიანის საქმესო.

რატომ არ უნდა შევადაროთ გირგვლიანის საქმეს? იქაც და აქაც ხელისუფლება იყო ჩარეული, მეტსაც გეტყვით, მაშინ მაღალი დონის ხელისუფლება იყო ჩარეული და იმას ვერ მოვერიეთ და ახლა სუბელიანის დონის ხელისუფლებაა ჩარეული და იმას ვერ ვერევით“, - თქვა ბერძენიშვილმა.