საზოგადოება

დღეს თბილისის 26-ე საერთაშორისო კონოფესტივალი გაიხსნება

1-დან 7 დეკემბრის ჩათვლით თბილისის 26-ე საერთაშორისო კინოფესტივალი გაიმართება. კინოფესტივალი 1 დეკემბერს კინოთეატრ «ამირანში» გაიხსნება.

გახსნის დღეს წარმოდგენილი იქნება იტალიელი რეჟისორის, პიეტრო მარჩელოს ფილმი « დუზე» (DUSE).

წელს კინოფესტივალის ეკრანები დაეთმობა ორმოცამდე უცხოურ და ოცდაათამდე ახალ ქართულ ფილმს. ფილმები გადანაწილებულია ტრადიციულ სექციებში: ევროპული ფორუმი, დამზადებულია გერმანიაში, ფრანგული კოლექცია, ახალი იტალიური კინო (ფესტივალი N.I.C.E. წარმოგვიდგენს), რეჟისორი ფოკუსში და ქართული პანორამა.

როგორც თბილისში, სასტუმრო “სტამბაში” გამართულ პრესკონფერენციაზე კინოფესტივალის დირექტორმა, გაგა ჩხეიძემ აღნიშნა, თბილისის 26-ე საერთაშორისო კინოფესტივალის სექციაში - “რეჟისორი ფოკუსში”- შვეიცარიელი კინორეჟისორი, პროდიუსერი და სცენარისტი ნიკოლა

ვადიმოვია წარმოდგენილი. მას თბილისის კინოფესტივალის “საპატიო პრომეთე” გადაეცემა .

«საპატიო პრომეთე» წელს ასევე გადაეცემა ქართველ მსახიობს, ავთო მახარაძეს.

რაც შეეხება ქართულ პანორამას, როგორც მისმა კოორდინატორმა ლევან აბდუშელიშვილმა აღნიშნა, ჟიური წლის საუკეთესო ქართულ ფილმს ოთხ კატეგორიაში გამოავლენს: სრულმეტრაჟიანი მხატვრული, სრულმეტრაჟიანი დოკუმენტური, მოკლემეტრაჟიანი მხატვრული და მოკლემეტრაჟიანი დოკუმენტური ფილმები.

კინოფესტივალის დაჯილდოების ცერემონია 6 დეკემბერს, კინოთეატრ „ამირანში“ გაიმართება.

ევროკავშირის ეგიდით გაიცემა პრიზი “ადამიანის უფლებების საუკეთესო ასახვისთვის ქართულ კინოში” როგორც მხატვრულ, ისე დოკუმენტურ კატეგორიებში.

თბილისის 26-ე საერთაშორისო კინოფესტივალის მხარდამჭერები არიან: ევროკავშირის დელეგაცია საქართველოში და გაეროს განვითარების პროგრამა, ასევე, გოეთეს ინსტიტუტი, ფრანგული ინსტიტუტი, იტალიის, შვედეთის, ნორვეგიის, შვეიცარიის და

ავსტრიის საელჩოები, დოკუმენტური კინოს ასოციაცია- DOCA.

განსაკუთრებით უნდა აღინიშნოს “ახალი იტალიური ფილმების ფესტივალის” (New Italian Cinema Events) სტუმრობა სპეციალური პროგრამით.

თბილისის საერთაშორისო კინოფესტივალის გენერალური პარტნიორია “თიბისი კონცეპტი”.

აღსანიშნავია, რომ წელს პირველად თბილისის საერთაშორისო კინოფესტივალი სახელმწიფოს დაფინანსების გარეშე ჩატარდება.