პოლიტიკა

დღეს მივიღეთ საბჭოთა ეპოქისთვის დამახასიათებელი კანონი - რომან გოცირიძე ე.წ. ფარული მოსმენების კანონზე

საპარლამენტო ფრაქცია „ერთიანი ნაციონალური მოძრაობის“ თავმჯდომარის, რომან გოცირიძის თქმით, პარლამენტის მიერ სამი მოსმენით დამტკიცებული ე.წ. ფარული მოსმენების კანონი იმეორებს საბჭოთა მოდელს და მოქალაქეებზე ტოტალურ კონტროლს გამოიწვევს.

გოცირიძე აღნიშნავს, რომ კანონის ამოქმედების წინააღმდეგ ენმ ხელმოწერების შეგროვებას დაიწყებს.

„ეს არის კიდევ ერთი შავი ლაქა ქართულ საპარლამენტო საქმიანობაში. დღეს მიიღეს საბჭოთა ეპოქისთვის დამახასიათებელი კანონი, ესაა ტოტალური კონტროლის გაგრძელება ადამიანებზე, ბიზნესსა და მთლიანად ქვეყნისა და საზოგადოებრივ ცხოვრებაზე. ჩვენ გავასაჩივრებთ ამ კანონს, შევეცდებით, 30 ხელმოწერა შევაგროვოთ, თუ არადა, მივმართავთ პრეზიდენტს, მივმართავთ სახალხო დამცველს და მივმართავთ ყველა სამართლებრივ მექანიზმს, რათა ეს კანონი არ შევიდეს მოქმედებაში“, - განაცხადა გოცირიძემ კენჭისყრის დასრულების შემდეგ.

შეგახსენებთ, რომ პარლამენტმა რიგგარეშე სხდომაზე მესამე და საბოლოო მოსმენით მიიღო ე.წ. ფარული მოსმენების შესახებ კანონი. საკონსტიტუციო ცვლილებათა პაკეტს 87-მა დეპუტატმა დაუჭირა მხარი, ხოლო 2-მა დეპუტატმა ამ კანონის წინააღმდეგ მისცა ხმა.

რიგგარეშე სხდომას პროტესტის ნიშნად არ დაესწრნენ „პატროტთა ალიანსისა“ და „ევროპული საქართველოს“ წევრები.

დღევანდელ სხდომაზე განიხილავდნენ საკანონმდებლო ცვლილებათა პაკეტის ტექნიკურ მხარეს.

აღნიშნულ კანონპროექტზე მუშაობა მას შემდეგ გახდა საჭირო, რაც 2016 წლის 14 აპრილს საკონსტიტუციო სასამართლომ ფარული მოსმენების არსებული წესი არაკონსტიტუციურად ცნო. სასამართლომ პარლამენტს დააკისრა ცვლილებების შეტანის ვალდებულება 2017 წლის 31 მარტამდე.

ანა მებურიშვილი