სამართალი

დღეს მივაღწიეთ განადგურებულ ოჯახს და კიდევ უფრო დაზარალებულ დაზარალებულებს - ნინო დარასელი

სამშენებლო კომპანია ცენტრ პოინტის ერთ-ერთი დამფუძნებლის, რუსუდან კერვალიშვილის შვილის, ნინო დარასელის განცხადებით, დღევანდელი გადაწყვეტილებით სასამართლომ მიაღწია მხოლოდ იმას, რომ მიიღო განადგურებული ოჯახი და კიდევ უფრო დაზარალებული დაზარალებულები.

როგორც დარასელმა თბილისის საქალაქო სასამართლოს მიერ გამოტანილი გადაწყევტილების შემდეგ მედიას განუცხადა, აღნიშნული გადაწყვეტილება აუცილებლად გასაჩივრდება.

„ეს პრობლემა მოგვარდებოდა. ჩვენს ოჯახზე მეტი ინტერესი, რომ ეს პრობლემა მოგვარებულიყო არავის არ ექნებოდა. როცა მოგვარდებოდა დაზარალებულების ინტერესები, მოგვარდებოდა ჩვენი პრობლემებიც. და დღეს მივაღწიეთ რას? ოთხი წლის წინ უკვე შეჩერებულ მშენებლობებს, ამორტიზირებულს რაც კი აშენებულა და განადგურებულ ოჯახს, და კიდევ უფრო დაზარალებულ დაზარალებულებს. ჩვენ ამ გადაწყვეტილებას აუცილებლად გავასაჩივრებთ. მე უბრალოდ მგონია, რომ ძალიან დიდი შეცდომა მოხდა“,-აღნიშნა დარასელმა.

დღეს, თბილისის საქალაქო სასამართლომ ცენტრ პოინტის საქმის „ამხანაგობა თაბუკაშვილი 88“-ის ეპიზოდზე, რუსუდან კერვალშვილი და მაია რჩეულშვილი 2 ნაწილში - თაღლითობასა და თანხების მითვისებაში სცნო დამნაშავედ.

და მათ 4-4 წლით თავისუფლების აღკვეთა მიესაჯათ.

მონიკა დავლიანიძე