სამართალი

დღეს ხორავას ქუჩაზე მოზარდების მკვლელობის საქმის სასამართლო განხილვაზე გრიფირებულ მტკიცებულებებს იკვლევენ

დღეს თბილისის საქალაქო სასამართლოში ხორავას ქუჩაზე მოზარდების მკვლელობის საქმის პროცესზე არსებულ მტკიცებულებებს, კერძოდ საქმეში გრიფირებულ ფარულ ჩანაწერებს იკვლევენ. ამის შესახებ საქმის პროკურორმა ზვიად ფხაკაძემ განაცხადა.

„დღევანდელ პროცესზე სახელმწიფო ბრალდების მხრიდან გაგრძელდება მტკიცებულებების გამოკვლევა, კერძოდ, გამოკვლეული იქნება საქმეში არსებული ფარული აუდიო- და ვიდეოჩანაწერები, ამასთანავე გამოკვლეული იქნება წერილობითი მტკიცებულებები“, - თქვა პროკურორმა.

ფხაკაძემ აღნიშნა, რომ მტკიცებულებების გაცნობის შემდეგ ბრალდების მხარე მოწმეების დაკითხვას გააგრძელებს.

ხორავას ქუჩაზე ორი მოზარდი 1-ელ დეკემბერს დაჭრეს, ერთ-ერთი მათგანი საავადმყოფოში მიყვანამდე გარდაიცვალა, მეორე კი მომდევნო დღეს.

შსს-მ მომხდარზე 2001 წელს დაბადებული ერთი არასრულწლოვანი დააკავა და ბრალი განზრახ მკვლელობის მუხლით წაუყენა. მოგვიანებით ძებნა გამოცხადდა კიდევ ერთ არასრულწლოვანზე, რომელსაც ბრალი განზრახ მკვლელობაში დაუსწრებლად წარედგინა. სასამართლომ ორივე ბრალდებულს აღკვეთის ღონისძიების სახით პატიმრობა შეუფარდა. ძებნაში მყოფი არასრულწლოვანი, გ.ჯ. პოლიციას 4 დეკემბერს ჩაბარდა.