საზოგადოება

დღეს დიდგორობაა

თეთრიწყაროს მუნიციპალიტეტის მერიის ორგანიზებით, დღეს დიდგორობის სახალხო დღესასწაული აღინიშნება. ინფორმაციას თეთრიწყაროს მუნიციპალიტეტი ავრცელებს.

მათივე ცნობით, ღონისძიება დატვირთული იქნება მასობრივი სანახაობებით. დიდგორის მემორიალის ტერიტორია დამთვალიერებლის წინაშე წარდგება, როგორც მუზეუმი ღია ცის ქვეშ.

„სპეციალურ სივრცეებში მოეწყობა ქართული რეწვის და ხელოვნების ნიმუშების გამოფენა-გაყიდვა, წარმოჩინდება ტრადიციული სამოსი, ორნამენტები, კულინარია. დღესასწაულის ფორმირება მოხდება დროსთან მიმართებაში. სცენაზე გაცოცხლდება აღმაშენებლის ეპოქა და თანამედროვე ეპოქასთან მისი შერწყმა მოხდება როგორც შემორჩენილი ტრადიციების გათამაშებით, ასევე უკვე მივიწყებული კულტურული მემკვიდრეობის აღდგენით. გაიმართება საბრძოლო ხელოვნების ნიმუშის წარმოდგენა, ასევე, საჭიდაო საჩვენებელი შეჯიბრებები: დოღი, ჭიდაობა, მკლავჭიდი. საკონცერტო ღონისძიებაში მონაწილეობას მიიღებენ - ქართული ესტრადის ცნობილი მომღერლები, ასევე წარმოდგენილნი იქნებიან როგორც ადგილობრივი, ასევე საქართველოს სხვადასხვა კუთხის სახელმწიფო და სახალხო ფოლკლორული ანსამბლები.

დიდგორის ბრძოლას, ქართველთა მრავალსაუკუნოვან ისტორიაში, გამორჩეული ადგილი უკავია. მეფე დავით აღმაშენებლის გონივრული სამხედრო სტატეგიის წყალობით, დიდგორი დამოუკიდებლობისათვის და თავისუფლებისათვის ბრძოლის, ერთიანობის და ქვეყნისათვის თავდადების სიმბოლოდ იქცა. 1121 წელს, დიდგორის ბრძოლის გამარჯვებამ დასაბამი მისცა ქვეყნის საბოლოო განთავისუფლება - გაერთიანებას და საქართველომ საბოლოოდ დაიმკვიდრა რეგიონის უძლიერესი სახელმწიფოს სახელი.

ღონისძიებაზე მიწვეულნი არიან, საქართველოს მთავრობის წევრები, პრეზიდენტი, დიპლომატიური კორპუსის წარმომადგენლები, სასულიერო პირები და ა.შ“,- ნათქვამია ინფორმაციაში.