სამართალი

დღეს დაიკითხება მოწმე, რომელმაც ექსპერტიზა თემირლან მაჩალიკაშვილის სახლიდან ამოღებულ ხელყუმბარაზე ჩაატარა.

დღეს ტერორიზმში ბრალდებული 6 პირის საქმეზე 4 ექსპერტი დაიკითხება, მათ შორის ის მოწმე, რომელმაც ექსპერტიზა თემირლან მაჩალიკაშვილის სახლიდან ამოღებულ ხელყუმბარაზე ჩაატარა.

პროკურატურის განმარტებით, ხელყუმბარა საბრძოლო ვითარებაში იყო მოყვანილი, რასაც არ ეთანხმება დაცვის მხარე.

მაჩალიკაშვილის ინტერესების უფლებადამცველის თქმით, ექსპერტთან შეკითხვები ექნება, მათ შორის კითხვა იმის თაობაზე, თუ რატომ ვერ დაადგინა ექსპერტიზამ თემირლან მაჩალიკაშვილის ანაბეჭდების არსებობა ხელყუმბარაზე.

ექსპერტიზის მიხედვით, ხელყუმბარაზე ანაბეჭდები აღმოჩნდა, თუმცა ნიმუში არ იყო საკმარისი იმისთვის, დადგენილიყო ვის ეკუთვნოდა ანაბეჭდი, რაც კატეგორიულად არ გამორიცხავს, რომ ხელყუმბარაზე აღმოჩენილი ნიმუში მაჩალიკაშვილს ან სხვა ნებისმიერ პირს ეკუთვნოდა.

2017 წლის 26 დეკემბერს პანკისის ხეობის სოფელ დუისში ჩატარებული სპეცოპერაციის დროს თემირლან მაჩალიკაშვილი თავის არეში დაჭრეს. ის 10 იანვარს თბილისში გარდაიცვალა.