პოლიტიკა

დღეს ჩვენ ვხედავთ, რა დღეშია კონსტიტუცია იმ ერთი კაცის გამო, რომელიც ბოლოს ოდესაში ნახეს _ ანი მიროტაძე

“დღეს მე ვეთანხმები ყველა იმ ადამიანს, ვინც ამბობს, რომ იმაზე უარესი რა უნდა დაემართოს კონსტიტუციას, რაც აქამდე სჭირდა”, – განაცხადა დღეს გამართულ პრესკონფერენციაზე „ეროვნული ფორუმის“ წევრმა ანი მიროტაძემ.

იგი მიიჩნევს, რომ კონსტიტუციის შექმნის დროს საზოგადოების უფრო მეტი ჩართულობა უნდა იყოს, რადგან კონსტიტუციის ერთი პარტიის ხელში ყოფნამ ქვეყანა სავალალო მდგომარეობამდე მიიყვანა.

„დღეს ჩვენ ვხედავთ, რა დღეშია კონსტიტუცია იმ ერთი კაცის გამო, რომელიც ბოლოს ოდესაში ნახეს, რასაკვირველია, მიხეილ სააკაშვილს ვგულისხმობ. კონსტიტუციაში უნდა ჩაერთოს ყველა, ეს იქნება საზოგადოება თუ პოლიტიკური პარტიები, რადგან გვაქვს პრეცედენტი იმისა, თუ რა მოუვიდა კონსტიტუციას, როცა ის იყო ერთი პარტიის ხელში“, – განაცხადა ანი მიროტაძემ.

მისივე თქმით, მომავალი კონსტიტუცია უმრავლესობის მიერ იქნება დაწერილი, რადგან კონსტიტუციის ჩასწორებისას, რეკომენდაციის დროს, პრიორიტეტები „ქართულ ოცნებას“ ექნება.

მიროტაძის ინფორმაციით, „ეროვნული ფორუმი“ კონსტიტუციის მუშაობისთვის შექმნილ კომისიაში არ ჩაერთვება.

“ამ კომისიას ჰყავს თავმჯდომარე – ირაკლი კობახიძე, ამიტომ ვინ ჩაერთვება მის მუშაობაში, არ აქვს მნიშვნელობა, რადგან ამტკიცებს „ქართული ოცნების“ უმრავლესობა.

ეს იქნება კონსტიტუცია, რომელიც ერთი პარტიის მიერ იქნება დაწერილი, თუმცა საჭიროა მის მუშაობაში ჩაერთონ საპარლამენტო ოპოზიციის წევრები“, – განაცხადა ანი მიროტაძემ.

ეროვნული ფორუმის წევრი პრეზიდენტის ინსტიტუტზეც ამახვილებს ყურადღებას და მიაჩნია, რომ თუ პრეზიდენტის უფლებები იმ სახით შენარჩუნდება, როგორიც ახლაა, სჯობს, საერთოდ გაუქმდეს.

„პრეზიდენტის ინსტიტუტი და უფლებები თუ ისეთი უნდა დარჩეს, როგორიც ახლა არის, ამას სჯობს, სულ გაუქმდეს. უნდა ჩაიწეროს გარკვევით კონსტიტუციაში, როგორი წყობა და რესპუბლიკა გვინდა“, – განაცხადა ანი მიროტაძემ.

ანი მიროტაძე: ეს იქნება კონსტიტუცია, რომელსაც ერთი პარტია დაწერს