სამართალი

დღეს ბათუმის მოვლენებისთვის ბრალდებული ირაკლი ჩხვირკიასა და მერაბ ღოღობერიძის საქმეზე მოსამართლის გადაწყვეტილება გახდება ცნობილი

დღეს ბათუმის საქალაქო სასამართლოში 11-12 მარტს ბათუმში მომხდარ მოვლენებში ბრალდებული ირაკლი ჩხვირკიასა და მერაბ ღოღობერიძის საქმეზე მოსამართლე დავით მამისეიშვილის გადაწყვეტილება გახდება ცნობილი.

მხარეები დასკვნითი სიტყვით უკვე გამოვიდნენ.

ჩხვირკიასა და ღოღიბერიძის წინააღმდეგ გამოძიება სსსკ-ის 225-ე მუხლის საფუძველზე დაიწყო და მათ ბათუმის მოვლენების ორგანიზებასა და ხელმძღვანელობას ედავება.

სასამართლოში ამ საქმის განხილვა 8 თვის განმავლობაში მიმდინარეობდა.

აქცია ბათუმში 11 მარტს დაიწყო, რომლის მიზეზად დემონსტრანტებმა საპატრულო პოლიციასა და მოქალაქეს შორის ინციდენტი დაასახელეს. პატრულმა მოქალაქე ჯერ არასწორი პარკირებისთვის დააჯარიმა, შემდეგ კი სიტყვიერი შეურაცხყოფისთვის დააკავა. დააკავეს მოქალაქის თანმხლები პირიც. თვითმხილველები ამბობდნენ, რომ პოლიციამ მოქალაქეს ფიზიკური შეურაცხყოფა მიაყენა და ამან გამოიწვია სპონტანური აქცია ადგილზე, რომელიც მოკლე ხანში ხალხმრავალი გახდა. აქციის მონაწილეებმა აჭარის პოლიციის მთავარი სამმართველოს უფროსის კახა ბუხრაძის გადადგომასა და დაკავებულების გათავისუფლებას ითხოვდნენ. შეკრება თითქმის მთელი ღამე გაგრძელდა, რომლის შედეგად დემონსტრანტებმა 7 ავტომობილი დაწვეს და ინფრასტრუქტურა დააზიანეს.

სისხლის სამართლის ბრალდებით 20-ზე მეტი პირი დააკავეს, დაახლოებით 19 ბრალდებულის მიმართ საპროცესო შეთანხმება გაფორმდა.