პოლიტიკა

დღეს არის ორი პრობლემა საქართველოში: სასამართლო და პროკურატურა, მათ სახელად ჰქვია ბიძინა ივანიშვილი -პაატა ბურჭულაძე

„საქართველოში დღეს ორი პრობლემაა: სასამართლო და პროკურატურა და მათ სახელად ბიძინა ივანიშვილი ჰქვია. მეტი პრობლემა საქართველოში არ არსებობს“, - ამის შესახებ ფონდ „იავნანას” დამფუძნებელმა პაატა ბურჭულაძემ არასამთავრობო სექტორთან, დიპლომატიური კორპუსის წარმომადგენლებთან და საზოგადოების წევრებთან შეხვედრაზე განაცხადა.

ბურჭულაძის თქმით, ფონდი მუშაობის შეწყვეტას არ აპირებს.

„დღეს არის ორი პრობლემა საქართველოში: სასამართლო და პროკურატურა, მათ სახელად ჰქვია ბიძინა ივანიშვილი, მეტი პრობლემა საქართველოში არ არსებობს. ეს პრობლემა თუ გადავწყვიტეთ, გაიმარჯვებს ჭეშმარიტება. არ ვაპირებთ ფონდის გაჩერებას, იმიტომ, რომ დამარცხება ნიშნავს სიკეთის მოსპობას საქართველოში. ფონდი „იავნანა“ იქნება ის, რომელიც შეებრძოლება ამ ბოროტებას",- აღნიშნა ბურჭულაძემ.

ცნობისთვის, ფონდ „იავნანასთან“ დაკავშირებით, პროკურატურაში გამოძიება დიდი ოდენობით თანხების მითვისება-გაფლანგვის მუხლით მიმდინარეობს. საქმეზე ფონდის არაერთი თანამშრომელი, მათ შორის ფონდის დამფუძნებელი პაატა ბურჭულაძე გამოიკითხა.

ამასთან, ფონდ „იავნანას“ დამფუძნებლის, პაატა ბურჭულაძის მეუღლის, ანჟელა ვასილენკოს წინააღმდეგ შესაძლოა, სისხლის სამართლებრივი დევნა დაიწყოს. პროკურატურა ვასილენკოს მიერ გამოკითხვაზე გამოუცხადებლობის საკითხზე მსჯელობას გეგმავს.