პოლიტიკა

დეპუტატებს ვთხოვ დავაჩქაროთ „შრომის უსაფრთხოების შესახებ“ კანონპროექტის მიღება - აკაკი ზოიძე

პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარემ აკაკი ზოიძემ მოუწოდა პარლამენტარებს, დააჩქარონ „შრომის უსაფრთხოების შესახებ“ კანონპროექტის მიღება.

აღნიშნულ საკითხზე ზოიძემ პარლამენტის დღევანდელ პლენარულ სხდომაზე განაცხადა.

ზოიძე გუშინ პოლიტკოვსკაიას ქუჩაზე მშენებლობაზე მუშის დაღუპვის ამბავს გამოეხმაურა. მისი თქმით, ახალი კანონპროექტით პრევენციული მექანიზმები შემუშავდება, რომლებიც მინიმუმდე დაიყვანს სამუშაო ადგილებზე დაღუპვის რისკებს.

„მთავრობის მიერ შემოტანილია ძალიან მნიშვნელოვანი კანონმდებლობა შრომის უსაფრთხოების სტანდარტების გამკაცრებასთან და კონტროლთან დაკავშირებით, რომელიც საკმაოდ მნიშვნელოვან შესაძლებლობებსა და მანდატს აძლევს შრომის ინსპექციას. კოლეგებს ვთხოვ, შესაბამის კომიტეტებში განხილვა ძალიან სრაფად მოხდეს და შევძლოთ, მივიღოთ ის პრევენციული მექანიზმი, რომელიც თავიდან აგვაცილებს, ან მინიმუმდე შეამცირებს ასეთ რისკებს“, - განაცხადა ზოიძემ.

ზოიძემ ყურადღება გაამახვილა, რომ ევროპაში საქართველო ერთ-ერთ წამყვან ადგილს იკავებს ერთ სულ მოსახლეზე შრომის უსაფრთხოების სტანდარტების დარღვევის გამო დაღუპულთა რაოდენობის მხრივ.

ანა მებურიშვილი