პოლიტიკა

დემოკრატიული რეფორმებით საქართველო რეგიონში ლიდერია - თეთრი სახლი

ამერიკის შეერთებული შტატები ქართველ ხალხს საპარლამენტო არჩევნების წარმატებით დასრულებას ულოცავს.

როგორც თეთრი სახლის ოფიციალურ ვებგვერდზე გამოქვეყნებულ განცხადებაშია ნათქვამი, არჩევნებმა დაადასტურა, რომ დემოკრატიული რეფორმებით საქართველო ლიდერია რეგიონში.

აქვე აღნიშნულია, რომ ეუთოს სადამკვირვებლო მისიის შეფასებით, როგორც 8 ოქტომბრის, ისე 30 ოქტომბრის არჩევნები კონკურენტული და კარგად ორგანიზებული იყო და პატივს სცემდა კანდიდატებისა და ამომრჩევლების უფლებებს.

თეთრი სახლის განცხადებაში ასევე ნათქვამია, რომ პოლიტიკური ლიდერები მთელი საარჩევნო პერიოდის განმავლობაში მხარდამჭერებს თავშეკავებისკენ მოუწოდებდნენ და მათ მნიშვნელოვანი როლი ითამაშეს, რათა ქართველ ამომრჩეველს თავისუფლად გაეკეთებინა არჩევანი.

აქვე, გამოთქმულია შეშფოთება ,,ძალადობისა და დაშინების იზოლირებული შემთხვევების გამო.’’
თეთრი სახლი საქართველოს ხელისუფლებას მოუწოდებს, ,,კანონის უზენაესობის შესაბამისად, დაბალანსებულად გამოიძიოს’’ ეს შემთხვევები.

ვაშინგტონი პოლიტიკურ პარტიებს საქართველოს დემოკრატიული განვითარებისთვის, უსაფრთხოებისა და ეკონომიკური კეთილდღეობისთვის თანამშრომლობისკენ მოუწოდებს. თეთრი სახლის განცხადებაში საქართველოს ახალ მთავრობასთან და პარლამენტთან თანამშრომლობის მოლოდინია გამოთქმული. აქვე ხაზგასმულია, ისიც, რომ ვაშინგტონი მხარს უჭერს საქართველოს დემოკრატიულ და ეკონომიკურ განვითარებას, ქვეყნის სუვერენიტეტსა და ტერიტორიული მთლიანობას.

განცხადებაში ასევე, გამოთქმულია მხარდაჭერა საქართველოს ევროატლანტიკური მისწრაფებების თვალსაზრისითაც.

ნინო ექვთიმიშვილი