პოლიტიკა

დემოკრატიული პროცესისთვის უკეთესი იქნება, თუ საპრეზიდენტო არჩევნებში პარტიული კანდიდატურა არ გვეყოლება - თამარ ჩუგოშვილი

პარლამენტის ვიცე-სპიკერის, თამარ ჩუგოშვილის განცხადებით, უმჯობესია, „ქართულმა ოცნებამ“ საპრეზიდენტო კანდიდატად პარტიული პირი არ დააყენოს.

დეპუტატის თქმით, გუნდში ჯერ ამაზე არ ჩამოყალიბებულან და ეს მისი პირადი აზრია.

„ქართული ოცნებას“ ისედაც აქვს საკონსტიტუციო უმრავლესობა პარლამენტში, ჰყავს თავისი მთავრობა, აქვს უმრავლესობა ადგილობრივ თვითმმართველობებში, შესაბამისად, ისედაც საკმაოდ დიდი დომინაციაა ჩვენი პოლიტიკური ძალის, ამიტომ წმინდა დემოკრატიული პროცესისთვის უკეთესი იქნება, თუ საპრეზიდენტო არჩევნებში პარტიული კანდიდატურა არ გვეყოლება. ვერ გავაკეთებთ იმას, რომ საერთოდ არ მივიღოთ მონაწილეობა, მაგრამ უკეთესი იქნება თუ უშუალოდ ჩვენი წრეებიდან არ ავარჩევთ კანდიდატს“, – განუცხადა ჩუგოშვილმა ჟურნალისტებს.

კითხვაზე, იქნება თუ არა ეს კანდიდატი სალომე ზურაბიშვილი, ჩუგოშვილმა აღნიშნა, რომ მისი საწინააღმდეგო არაფერი არ აქვს და გააჩნია, სხვა კანდიდატები ვინ იქნებიან.