სამართალი

დეკანოზს სთავაზობდნენ, რომ თუ წყნარად იქნებოდა და არ იხმაურებდა, მას გამოუშვებდნენ - ადვოკატი

დეკანოზ გიორგი მამალაძეს, პირები, რომლებიც არ იყვნენ პროკურატურის თანამშრომლები, დუმილის სანაცვლოდ თავისუფლებას სთავაზობდნენ, - განუცხადა ჟურნალისტებს დეკანოზის ადვოკატმა გიორგი ფანცულაიამ განუცხადა.

ადვოკატის ინფორმაციით, ბრალდებულმა დღეს პირველად ისაუბრა ამ ფაქტებზე და აღნიშნა, რომ არც თუ ისე შორეულ წარსულში, მასთან გარკვეული პირები იმყოფებოდნენ საპატიმროში, ,,მას კონკრეტულ შეთავაზებებს უკეთებდნენ“.

"არც ისე შორეულ წარსულში იყო რამდენიმე პირი, რომელიც არ იყო პროკურატურის თანამშრომელი, რომელიც მასთან შევიდა და როგორც თვითონ ამბობს, ესაუბრა იმაზე, რომ თუ ის ზედმეტ პრობლემებს არ შექმნიდა და არ იხმაურებდა, თავისუფლებაზე იქნებოდა", - განაცხადა გიორგი ფანცულაიამ, თუმცა ადვოკატს არ დაუკონკრეტებია, იყვნენ თუ არა ეს ადამიანები სასულიერო პირები.

მისივე თქმით, დეკანოზმა საბოლოო სიტყვაში პროკურატურის მხრიდან მასზე განხორციელებულ ზეწოლაზეც ისაუბრა და განაცხადა, რომ მისგან პატრიარქის მკვლელობის მომზადების აღიარებასა და თანამზრახველებად მეუფე დიმიტრისა და პატრიარქის დაცვის ყოფილი უფროსის, სოსო ოხანაშვილის დასახელებას სთხოვდნენ.

"დეკანოზმა ისაუბრა იმაზე, თუ როგორ სთავაზობდნენ მას, არამარტო პროკურატურის თანამშრომლები, არამედ სხვა პირებიც თანამშრომლობას. ამაზე იყო კონკრეტული საუბარი. კერძოდ, სთავაზობდნენ, რომ თუ წყნარად იქნებოდა, ბევრ პრობლემას არ შექმნიდა და არ იხმაურებდა, მას გამოუშვებდნენ. ასევე ისაუბრა იმაზე, თუ რატომ არის აბსურდული ის გარემოება, რომ თითქოს მას შორენა თეთრუაშვილის მკვლელობა სჭირდებოდა კარიერული წინსვლისთვის. ისაუბრა მის ფუნქციებსა და თანამდებობებზე საპატრიარქოში", - განაცხადა ფანცულაიამ.

თბილისის სააპელაციო სასამართლოს მოსამართლეთა კოლეგია ე.წ. ციანიდის საქმეზე ამ ეტაპზე სათათბიროდაა გასული.

ნინო ექვთიმიშვილი