სამართალი

დეკანოზი გიორგი მამალაძე გამოძიებას ჩვენებას აძლევს

ე.წ. ციანიდის საქმეზე დაკავებული დეკანოზი გიორგი მამალაძე გამოძიებას ჩვენებას აძლევს.

პროკურატურის წარმომადგენლები ე.წ. მატროსოვის ციხეში მივიდნენ.

ადგილზე იმყოფებიან ბრალდებული დეკანოზის ადვოკატებიც.

როგორც ადვოკატმა მიხეილ რამიშვილმა დაკითხვსი დაწყებამდე ჟურნალისტებს განუცხადა, მამა გიორგი მამალაძის ჩვენების საფუძველზე მის მიმართ წაყენებული ბრალის საფუძვლები რადიკალურად განსხვავებული იქნება.

“მამა გიორგი იძლევა იმ ჩვენებას, რისი მიცემაც მას სურს, ის არაფრის შეცვლას არ აპირებს და აბსოლუტურად რადიკალურად განსხვავებული იქნება ამ ჩვენების საფუძველზე მის მიმართ წაყენებული ბრალის საფუძვლები. თუმცა, რა თქმა უნდა, ეს იმაზეცაა დამოკიდებული, როგორ შეაფასებს მტკიცებულებებს პროკურატურა”, - განაცხადა მიხეილ რამიშვილმა.

თავის მხრივ, პროკურატურა დაცვის მხარეს სპეკულაციაში ადანაშაულებს. საქმის პროკურორი ჯარჯი წიკლაური ამბობს, რომ ადვოკატებმა ხელოვნური აჟიოტაჟი ატეხეს, თითქოს გამოძიება დაკითხვის პროცესს ხელოვნურად აჭიანურებს.

„თუ ადვოკატისთვის ასე მნიშვნელოვანი იყო ჩვენება, მას თავად შეეძლო გამოეკითხა ბრალდებული და ჩვენება წარედგინა გამოძიებისთვის,“ - განაცხადა ჯარჯი წიკლაურმა.

წიკლაური თქმით, ბრალდებულმა დეკანოზმა არა ერთხელ აარიდა თავი ჩვენების მიცემას. მისივე თქმით, მამა გიორგი მამალაძე იმიზეზებდა არაერთ ფაქტს, რათა თავი აერიდებინა საგამოძიებო მოქმედებებში მონაწილეობისგან.

საქმის პროკურორის განცხადებით, დეკანოზს 5-ჯერ შესთავაზეს ჩვენების მიცემა, რაზეც უარი თქვა.

ნინო ექვთიმიშვილი