სამართალი

დეკანოზ გიორგი მამალაძის შეწყალების საკითხი უახლოეს სხდომაზე, თანხმობის დოკუმენტაციის მიღების შემდეგ გავა განსახილველად - ზვიად ქორიძე

შეწყალების კომისიის თავმჯდომარის, ზვიად ქორიძის განცხადებით, დეკანოზ გიორგი მამალაძის შეწყალების საკითხი მას შემდეგ განიხილება, რაც კომისია პენიტენციური დაწესებულებიდან თავად მსჯავრდებულის თანხმობის დოკუმენტაციას მიიღებს.

მისი თქმით, დეკანოზის შეწყალების თაობაზე მიმართვა კომისიაში დღეს შევიდა.

„დღეს შემოვიდა განცხადება დეკანოზის შეწყალების თაობაზე, რამდენიმე წუთის წინ დარეგისტრირდა. განცხადება ელექტრონულად აიტვირთება და შემდეგ, რამდენიმე დღეში, პრეზიდენტის ადმინისტრაციიდან საპატიმრო დაწესებულებაში მოთხოვნა გაიგზავნება, სადაც უშუალოდ მსჯავრდებულმა უნდა მოაწეროს ხელი შეწყალების მოთხოვნას.

შეწყალების პროცედურის დადგენილი წესის მიხედვით, რომელიც განსაზღვრა საქართველოს პრეზიდენტმა, აუცილებელია თავად მსჯავრდებულის თანხმობა. როცა ჩვენ მივიღებთ თანხმობის დოკუმენტაციას დაწესებულებიდან, რომელიც მომზადდება სპეციალური ცნობის სახით შეწყალების კომისიისთვის, საკითხი უახლოეს სხდომაზე გავა განსახილველად“, – განმარტა ქორიძემ.

ცნობისთვის, ე.წ. ციანიდის საქმეზე მსჯავრდებული გიორგი მამალაძის ადვოკატებმა საქართველოს პრეზიდენტს დეკანოზის შეწყალების თხოვნით დღეს მიმართეს.