პოლიტიკა

დედაქალაქის 2016 წლის ბიუჯეტში ცვლილებები იგეგმება

თბილისის საკრებულოში სხდომა მიმდინარეობს, რომელზეც 2016 წლის ბიუჯეტში შესატანი ცვლილებების პროექტს განიხილავენ. საუბარია 14 მილიონ ლარზე, რომელიც ახლებურად უნდა გადანაწილდეს - საკრებულოს ფრაქცია ,,ქართულ ოცნებაში“ განმარტავენ, რომ ბოლო პერიოდში შვიდი ახალი საბავშო ბაღი გაიხსნა, რაზეც დამატებით 8 მილიონნახევარი უნდა დაიხარჯოს, ხოლო ხუთნახევარი მილიონი ლარი სოციალურ პროექტებს მოხმარდება.

საკრებულოს ოპოზიცია უმრავლესობის განმარტებებს არ ენდობა, დაგეგმილ ცვლილებებს წინასაარჩევნოდ, თანხების არამიზნობრივ ხარჯვას უკავშირებს და აღნიშნული პროექტის მხარდაჭერას არ აპირებს.

,,ვითხოვთ დოკუმენტალურად გაანალიზებულ ჩამონათვალს, სად მიდის საბავშვო ბაღებისთვის რვა მილიონი - როდესაც საუბარია, რომ გაიზარდა ბავშვების რაოდენობა, რომ ადრე დამთავრდა ბაღების მშენებლობები - მოვითხოვთ პასუხს, როდის გაიზარდა რაოდენობა, რომელ ბაღებზეა საუბარი, რამდენი შტატი მოემატა საბავშვო ბაღებს - ამ ეტაპზე ეჭვი ჩნდება, თუ დეტალურ ინფორმაციას არ წარმოადგენს მერია, ბუნებრივია ვერ დავუჭერთ მხარს“, - განაცხადა ფრაქცია რესპუბლიკელების ლიდერმა ხათუნა სამნიძემ.

,,წინასაარჩევნო პერიოდში, დავით ნარმანიამ და ,,ქართულმა ოცნებამ“ თბილისის ბიუჯეტი ხარჯა ისე, რომ ადვილი ყოფილიყო ამომრჩეველზე ზემოქმედება. მათ ფაქტობრივად სრულად აითვისეს სოციალური ხარჯები, საიდანაც წინასაარჩევნოდ უხვად არიგეს ერთჯერადი დახმარებები და ახლა იმისთვის, რომ ეს ბიუჯეტი შეავსონ, ამცირებენ ისეთ პრიორიტეტულ მუხლებს, როგორიცაა საგზაო მიმართულება, ავარიული კორპუსების მშენებლობა და კეთილმოწობის ღონისძიებები“, - განაცხადა საკრებულოს ფრაქცია ნაციონალური მოძრაობის წევრმა ირაკლი ნადირაძემ.

ფრაქცია ,,ქართული ოცნების“ წევრი ჯაბა სამუშია ოპონენტების ბრალდებებს ტყუილს უწოდებს.

,,ჩვენი ოპონენტები საუბრობენ, რომ თითქოსდა სოციალურ მუხლში ამოიწურა თანხები და აქედან გამომდინარე, დამატებაა საჭირო, რაც ტყუილია. არანაირი წინასაარჩევნო კამპანია ამ კონკრეტული მიმართულებით არ დატყობია ბიუჯეტს. გადაწყვიტა ქალაქის მერიამ და საკრებულოს უმრავლესობამ, რომ ახალ წელთან დაკავშირებით, კიდევ ერთი პროექტი განგვეხორციელებინა სოციალურად დაუიცველებისთვის. ამიტომაც არის, რომ ჩვენ გადავწყვიტეთ, საშუალოდ 250 -300 ათასი ლარი სხვადასხვა რაიონს დავუმატოთ“, - განაცხადა სამუშიამ.

მარი ნამგალაძე