სამართალი

დაზარალებულებისთვის უკვე 18,5 მილიონის ღირებულების უძრავ-მოძრავი ქონებაა დაბრუნებული - ირაკლი ნადარეიშვილი

სამართალწარმოების პროცესში ჩადენილი დანაშაულის გამოძიების დეპარტამენტის უფროსის, ირაკლი ნადარეიშვილის განცხადებით, დაზარალებულებისთვის დაახლოებით 18,5 მილიონის ოდენობის უძრავ-მოძრავი ქონებაა დაბრუნებული.

ამის შესახებ ნადარეიშვილმა მედიას საჯარო დისკუსიის „წარსულში ადამიანის უფლებათა დარღვევები და სახელმწიფო რეაგირების პოლიტიკა“ ფარგლებში განუცხადა.

მისი თქმით, კონფერენციაზე დეპარტამენტმა საკუთარი ხედვები წარადგინა: შესაძლებელი იყო თუ არა მეტის გაკეთება, რა იყო ამისთვის საჭირო, რა არის საჭირო რომ უფრო ეფექტური გახდეს დეპარტამენტის მუშაობა.

„დაახლოებით 18,5 მილიონი ღირებულების უძრავ-მოძრავი ქონებაა დაბრუნებული. სულ 105 პირი არის დაზარალებულად ცნობილი. აქედან, 20-ის საკითხი მიმართულია სასამართლოსთვის შუამდგომლობით განაჩენის გადახედვაზე, ხოლო დანარჩენები არის ქონებრივ ნაწილში დაზარალებულად ცნობილი და მათ დიდ ნაწილს უკვე დაუბრუნდა ქონება, მცირე ნაწილისთვის კი, დაბრუნების პროცესშია",- განაცხადა ნადარეიშვილმა.

რაც შეეხება ძალადობის საკითხს, „გახნსილი არის ისეთი ფაქტები, როგორიც არის მაგალითად, კობა დავითაშვილზე განხორციელებული უკანონო ქმედება, რასაც მისი ფიზიკური დაზიანება მოჰყვა“.

მონიკა დავლიანიძე