პოლიტიკა

დავუჭერთ მხარს დავით ბაქრაძეს მეორე ტურის შემთხვევაში და ველით იგივე, მკაფიო, ნათელ განცხადებას „ევროპული საქართველოსგან“ - გიორგი ვაშაძე

გაერთიანებული ოპოზიცია „ძალა ერთობაშიას" საპრეზიდენტო კამპანიის ხელმძღვანელი გიორგი ვაშაძე გამოეხმაურა „ევროპული საქართველოს“ ერთ-ერთი ლიდერის, გიგა ბოკერიას შეკითხვას, დაუჭერს თუ არა გრიგოლ ვაშაძე მხარს დავით ბაქრაძეს, თუკი ეს უკანასკნელი საპრეზიდენტო არჩევნების მეორე ტურში გავა.

გიორგი ვაშაძემ საპასუხოდ განაცხადა, რომ „ძალა ერთობაშია“ დაუჭერს მხარს დავით ბაქრაძეს და იმავეს ელოდება „ევროპული საქართველოსგან“ მეორე ტურის ჩატარების შემთხვევაში.

გიორგი ვაშაძის თქმით, ყველანაირი კვლევით, მაღალი ალბათობით, გრიგოლ ვაშაძე პირველივე ტურში იმარჯვებს.

„საზოგადოებრივი განწყობითა და ბოლო პერიოდში ჩატარებული მაღალი რეპუტაციის მქონე ორგანიზაციის კვლევებით, გაერთიანებული ოპოზიციის კანდიდატი, გრიგოლ ვაშაძე ერთპიროვნულად ლიდერობს საპრეზიდენტო კანდიდატებს შორის და მაღალი ალბათობით, პირველივე ტურში იმარჯვებს. რაც შეეხება ჰიპოთეტურ დაშვებას, მეორე ტურში ევროპული საქართველოს კანდიდატის მხარდაჭერის თაობაზე, ვაცხადებთ, რომ დავუჭერთ მხარს და ველით იგივე, მკაფიო, ნათელ განცხადებას მათგან და სხვა ოპოზიციური პარტიებისგან”, - თქვა გიორგი ვაშაძემ.