პოლიტიკა

დავით უსუფაშვილი საკუთარი პოლიტიკური გაერთიანების პრეზენტაციას ერთ კვირაში გამართავს

საქართველოს პარლამენტის ყოფილი თავმჯდომარე დავით უსუფაშვილი ახალი პოლიტიკური გაერთიანების ჩამოყალიბებასთან დაკავშირებით მოლაპარაკებებს მართავს.

მედიისთვის რამდენიმე გვარი გახდა ცნობილი, ვინც შესაძლოა უსუფაშვილის გაერთინაებაში მოხვდეს, ესენია ირაკლი ჩიქოვანი, გიორგი ისაკაძე, ვახუშტი მენაბდე, კოტე ჩოკორაია, დავით აფრასიძე.

გარდა ამისა, დავით უსუფაშვილის გაერთიანებაში ძველი თანაგუნდელები მოხვდება-ვახტანგ ხმალაძე, ფრიდონ ებანოიძე, თემურ ნერგაძე, ფრიდონ საყვარელიძე.

საზოგადოებრივ მაუწყებელთან საუბარში უსუფაშვილმა დაადასტურა, რომ ნამდვილად შეხვედრია აღნიშნულ პირებს.

„ძალიან ბევრ ადამიანს შევხვდი ბოლო 3-4 თვეში. არ უარვყოფ, რომ შეხვედრები მქონდა იმ ადამიანებთანაც, რომლეზეც კითხვა დამისვით, მაგრამ დანარჩენს ვერაფერს გეტყვით“,–აღნიშნა უსუფაშვილმა.

პარლამენტის ყოფილი თავმჯდომარის განცხადებით, ახალი პოლიტიკური გუნდის შესახებ განცხადებას დაახლოებით ერთ კვირაში გააკეთებს.

„უახლოეს დღეებში, მაქსიმუმ ერთ კვირაში მოგახსენებთ უკვე კონკრეტულ გადაწყვეტილებებს იმის თაობაზე, თუ რა ტიპის პოლიტიკურ ძალას ეყრება საფუძველი, რა ეტაპებს გაივლის ეს პოლიტიკური ძალა, ძირითადად რა პრინციპებზე იქნება აწყობილი. აგრეთვე, მოგახსენებთ ადგილობრივ არჩევნებთან დაკავშირებით ჩვენს გადაწყვეტილებას, კონკრეტულად, თბილისში, ასევე, სხვა ქალაქებშიც, ვინაიდან, ადგილობრივი არჩევნები ძალიან მნიშვნელოვანი პოლიტიკური მოვლენაა. რა თქმა უნდა, ამ პროცესში აქტიურად მივიღებთ მონაწილეობას“,- განახცადა უსუფაშვილმა.

მისივე თქმით, პოლიტიკური ძალის წარმატებისთვის იგი უნდა იყოს მყარად დაფუძნებული საზოგადოებაზე, მოქალაქეებზე და მისი შექმნის პროცესი დიდწილად განაპირობებს ამ პარტიის შემდგომ განვითარებასაც

„პოლიტიკურ, პარტიულ ცხოვრებაში გარკვეული გამოცდილება დამიგროვდა. ეს გამოცდილება მკარნახობს - პოლიტიკური ძალა რომ იყოს წარმატებული, უნდა იყოს ძალიან მყარად დაფუძნებული საზოგადოებაზე, მოქალაქეებზე და მისი შექმნის პროცესი დიდწილად განაპირობებს ამ პარტიის შემდგომ განვიტარებასაც, ამიტომ, ეს ყველაფერი იქნება გათვალისწინებული. საქმე არის საშური, მაგრამ ჩვენ ვიჩქარებთ ნელა“,-განმარტა დავით უსუფაშვილმა.

როგორც უსუფაშვილმა აღნიშნა, უფრო მნიშვნელოვანი იქნება, თუ რისთვის იქმნება პარტია, რა იდეებისთვის, რა საჭიროებებისთვის.

“ყველაფერს გავაკეთებთ, რომ აქცენტი არ იყოს გადატანილი „ვინ“-ზე, ამ საკითხში „ვინ“-ები გამოჩნდებიან ეტაპობრივად, მაშინ, როდესაც საქმეს დასჭირდება. პირველი და მთავარი იქნება, რა სჭირდება ქვეყანას, რის გარშემო გაერთიანებას ვცდილობთ ყველანი“,-განაცხადა დავით უსუფაშვილმა.

მონიკა დავლიანიძე