პოლიტიკა

დავით უსუფაშვილი პარლამენტის აპარატის თანამშრომლებს მომავალ შეხვედრამდე დაემშვიდობა

მერვე მოწვევის პარლამენტის თავმჯდომარე დავით უსუფაშვილი პარლამენტის აპარატის თანამშრომლებს დაემშვიდობა. უსუფაშვილმა პარლამენტის ეზოში შეკრებილ თანამშრომლებს სიტყვით მიმართა და პარლამენტის მუშაობაში გაწეული საქმიანობისთვის მადლობა გადაუხადა.

,,გავიდა ოთხი წელი, რაც ჩვენ ამ შენობაში შემოვაბიჯეთ და ბედნიერი ვარ, თუკი შევასრულეთ ყველა მოვალეობა, რაც ჩვენზე იყო დაკისრებული. დარწმუნებული ვარ, რომ საქართველოს უკეთესი და უკეთესი პარლამენტი ეყოლება. მე გემშვიდობებით მომავალ შეხვედრამდე. ჩვენ კვლავაც შევხვდებით ერთმანეთს, რადგან ცხოვრება გრძელდება.

ჩემი დღევანდელი გამოსვლა კი, მხოლოდ ერთი სიტყვით შეიძლებოდა შემოფარგლულიყო და ეს სიტყვაა - მადლობა.

თქვენ იცით, საქართველოს როგორ ემსახუროთ.

ახლა გული სიხარულით მაქვს სავსე იმიტომ, რომ დღევანდელი დღე პარლამენტის ცხოვრებაში რაღაც ეტაპის დასასრულია და ახალი ეტაპი იწყება, უკეთესი ეტაპი, რომელსაც კიდევ უფრო უკეთესი მოჰყვება და ეს ყველაფერი ნამდვილად ასე იქნება. სჯობს, ადამიანმა პარლამენტის თავმჯდომარეობა ცხოვრებაში ერთხელ გამოსცადოს, ქვეყანაში სხვა ბევრი საქმეა საკეთებელი, მათ შორის პარლამენტშიც“, - მიმართა თანამშრომლებს უსუფაშვილმა.

მარი ნამგალაძე