სამართალი

დავით როსტომაშვილზე ჯგუფურად ყაჩაღობის საქმეზე მსჯავრდებული სასამართლო დარბაზიდან გათავისუფლდა

თბილისის სააპელაციო სასამართლოს მოსამართლეთა კოლეგიამ იუმორისტ დავით როსტომაშვილის ჯგუფურად ყაჩაღობის საქმეზე ერთ-ერთი მსჯავრდებული, ზურაბ ქუთელია უდანაშაულოდ სცნო და ის პირდაპირ სასამართლო დარბაზიდან გაათავისუფლა.

ქუთელიას ადვოკატის, გიორგი ბარდაველიძის განცხადებით, დაცვის მხარემ სასამართლოში ახალი მტკიცებულება წარადგინა, რომელიც საქმეში მსჯავრდებულის ბრალეულობას გამორიცხავს.

ადვოკატის ინფორმაციით, გუშინდელ სასამართლო პროცესზე ახალი მტკიცებულებების წარდგენის შემდეგ მოსამართლეთა კოლეგია განაჩენის გამოსატანად გავიდა და მსჯავრდებულის მიმართ გამამართლებელი განაჩენი გამოიტანა.

,,იმ პირს, რომელსაც ქუთელიას უკავშირებდნენ, იდაყვიდან მაჯამდე აღენიშნებოდა არაერთი სვირინგი. ზურაბ ქუთელიას კი, სვირინგი აბსოლუტურად სხვა ადგილზე აქვს“, - აღნიშნა ადვოკატმა.

რაც შეეხება დანარჩენ ორი მსჯავრდებულს, ბექა კირვალიძისა და არტემ აგაჯანოვის მიმართ განაჩენი მეორე ინსტანციის სასამართლომ უცვლელად დატოვა.

ცნობისთვის, მსახიობ და იუმორისტ დავით როსტომაშვილზე თავდასხმაში ბრალდებულები ბექა კირვალიძე და ზურაბ ქუთელია თბილისის საქალაქო სასამართლოს მოსამართლე ნათია გუდაძემ დამნაშავედ სცნო ყაჩაღობაში და სასჯელის სახით 10 და 7 წლით თავისუფლების აღკვეთა შეუფარდა.

რაც შეეხება კიდევ ერთ ბრალდებულს, არტემ აგაჯანოვს, მას მოსამართლემ 6 წლით თავისუფლების აღკვეთა შეუფარდა.