სამართალი

დავით ოქიტაშვილმა ირაკლი პეტრიაშვილის წინააღმდეგ საქალაქო სასამართლოში სარჩელი შეიტანა

გაერთიანებული პროფკავშირების თავმჯდომარეობის კანდიდატმა დავით ოქიტაშვილმა, მოქმედი თავმჯდომარის ირაკლი პეტრიაშვილის წინააღმდეგ თბილისის საქალაქო სასამართლოში სარჩელი შეიტანა.

როგორც მედიას ოქიტაშვილის ადვოკატმა შალვა ხაჭაპურიძემ განუმარტა, პროფკავშირების ხელმძღვანელობა სამართლებრივ სივრცეშია დასაბრუნებელი, რადგან, მისი თქმით, არსებობს ისეთი დარღვევები, რომელიც ეხება კრების მოწვევის წესს და სხვა.

„მოქმედი კანონმდებლობის მეშვეობით საქართველოს პროფკავშირის ხელმძღვანელობა უნდა დავაბრუნოთ სამართლებრივ სივრცეში. სარჩელის დეტალების გასაჯაროებაზე თავს შევიკავებ, თუმცა გეტყვით, რომ საკითხი ძირითადად ეხება დელეგატების სიების არგადმოცემას, კრების მოწვევის წესის დარღვევას და სხვა ისეთ მნიშვნელოვან გარემოებას, რომელიც დიდი კითხვის ნიშნის ქვეშ აყენებს ლეგიტიმურობას, თავად ყრილობის მოწვევის საკითხს“,-აღნიშნა ადვოკატმა.

თავად ოქიტაშვილის თქმით, პეტრიაშვილი მორიგჯერ აპირებს არჩევნების გაყალბებას.

„იქიდან გამომდინარე, რომ პეტრიაშვილი ემზადება გაყალბებისთვის, ჩვენ მას ამის საშუალებას არ მივცემთ. საზოგადოებამ უნდა აიმაღლოს ხმა იმ უმსგავსოების წინააღმდეგ, რაც ხდება დღეს გაერთიანებულ პროფკავშირებში. ჩვენ არ გავჩერდებით. აქ უკვე აღარ აქვს მნიშვნელობა ვინ იქნება პროფკავშირის თავმდჯომარე, აქ მნიშვნელოვანია, რომ საზოგადოებამ გაიგოს ის 12 წლიანი ფეოდალური მმართველობა, რა ფეოდალური მმართველობითაც, ნეპოტიზმით მართავდა ბატონი პეტრიაშვილი ამ დარგს“,-აღნიშნა ოქიტაშვილმა.

მონიკა დავლიანიძე