პოლიტიკა

დავით ნარმანიას საკრებულოში იბარებენ

თბილისის საკრებულოს ფრაქცია „მოძრაობა თავისუფლება - თბილისი“ ყოფილი მთავარი პროკურორის, ოთარ ფარცხალაძისთვის მიწების გადაცემის საკითხთან დაკავშირებით დედაქალაქის მერს, დავით ნარმანიას საკრებულოში იბარებს.

შესაბამისი გადაწყვეტილება „მოძრაობა თავისუფლება - თბილისის“ წევრებმა ფრაქციის სხდომაზე მიიღეს, რომელზეც თბილისის ქონების მართვის სააგენტოს ხელმძღვანელმა კარლო ლაფერაძემ ფარცხალაძისთვის მიწების გადაცემის საკითხზე ოფიციალური დოკუმენტაცია წარადგინა.

როგორც სხდომის დასრულების შემდეგ საკრებულოს ოპოზიციონერმა დეპუტატმა მამუკა ახვედიანმა ჟურნალისტებს განუცხადა, კარლო ლაფერაძის მიერ მათთვის გადაცემულ დოკუმენტაციას დეტალურად გაეცნობიან.

„იურიდიულად შესაძლოა ყველაფერი დალაგებულია, თუმცა ცალსახად მინდა აღვნიშნო ერთი მნიშვნელოვანი რამ, აქამდე მერიაში არსებულ კორუფციულ გარიგეგებთან დაკავშირებით კითხვები უჩნდებოდა ოპოზიცურ ფრაქციებს, დამოუკიდებელ დეპუტატებს, დღეს კითხვები უჩნდება სახელმწიფო აუდიტის სამსახურს. სახელმწიფო აუდიტის სამსახურმა მოიკვლია და შესაბამისი შუალედური დასკვნა პროკურატურაში გადააგზავნა. დასკვნაში საუბარია, რომ აღნიშნულ საკითხზე შესაძლოა იყოს კორუფციული გარიგება ფარცხალაძესა და თბილისის მერიას შორის, ამიტომ აღნიშნულ საკითხთან დაკავშირებით თბილისის მერი საკრებულოში აუცილებლად უნდა მობრძანდეს. დავით ნარმანიამ უნდა გასცეს ყველა კითხვას პასუხი, რატომ მოხდა შესაბამისი გადაწყვეტილების მიღება“, - განაცხადა მამუკა ახვლედიანმა.

მისივე თქმით, დღეიდან ფრაქცია საკრებულოში თბილისის მერის მისაყვანად ხელმოწერების შეგროვრებას დაიწყებს.

ნინო ექვთიმიშვილი