პოლიტიკა

დავით კირკიტაძის ცხოვრების მანძილზე არასდროს არ ყოფილა პრეცენდენტი, რომ მას შეურაცხყოფა მიეყენებინა პოლიციელისთვის - ადვოკატი

დავით კირკიტაძის ადვოკატმა, გიორგი კონდახაშვილმა გურჯაანის რაიონულ სასამართლოსთან შეკრებილ „გაერთიანებული ოპოზიციის“ ლიდერებსა და მხარდამჭერებს, მისი დაცვის ქვეშ მყოფის გზავნილი გააცნო.

„სამართლიანობისთვის ბრძოლაში არცერთი ნაბიჯით უკან - ეს არის მისი სიტყვები, რაც შეეხება სამართლებრივ მხარეს, დღეს წარედგინა დავითს ბრალი პოლიციელზე თავდასხმის მუხლით, რომელიც იმყოფებოდა ერთ-ერთ ავტობუსში, ეს არის ბრალდების შინაარსი და თითქოს, ამის გამო იგი უნდა იყოს დაპატიმრებული. ყველა სამართლებრივი გზით ჩვენ ვაგრძელებთ ბრძოლას, ბატონი დავითისგან მინდა გადაგიხადოთ მადლობა თანადგომისთვის, ბრძოლის ჟინისთვის. ის აცხადებს შიმშილობას და გააკეთებს ყველაფერს, რომ სიმართლე დაამტკიცოს. მან თქვა, რომ ის დიდ პატივს სცემდა ყოველთვის პოლიციელებს და მისი ცხოვრების მანძილზე არასდროს არ ყოფილა პრეცენდენტი, რომ შეურაცხყოფა მიეყენებინა მათთვის, ეს არის საზოგადოების შეცდომაში შეყვანის მცდელობა“, - განაცხადა კირკიტაძის უფლებადამცველმა.

გაერთიანებული ოპოზიციის ერთ-ერთ ლიდერ დავით კირკიტაძეს, რომელიც ორი დღის წინ 16 დეკემბერს განვითარებული მოვლენების შედეგად დააკავეს, თელავის პოლიციის იზოლატორში ბრალი ოფიციალურად წარუდგინეს.

დავით კირკიტაძეს გამოძიება ველისციხეში გამართულ აქციაზე პოლიციელზე თავდასხმისთვის, ფიზიკური შეურაცხყოფისა და ქონების დაზიანებისთვის სისხლის სამართლის კოდექსის 353-ე პრიმა მუხლით ედავება.