სამართალი

დავით კირკიტაძეს 27 პარლამენტარი უდგებოდა თავდებში, მათ შორის უმრავლესობის წევრები - ადვოკატი

დავით კირკიტაძის ადვოკატის გიორგი კონდახაშვილის ინფორმაციით, ბრალდებულს თავდებში უდგებოდა 27 დეპუტატი, რომელთა შორის უმრავლესობის წევრებიც იყვნენ, თუმცა ეს მოსამართლემ არ გაითვალისწინა.

„ძალიან დიდი იმედი გვქონდა, რომ სასამართლო სამართლიანობის ფარგლებში დარჩებოდა, თუმცა სიმბოლურია, რომ მოსამართლე სათათბიროდაც კი არ გავიდა, ელემენტარულად რომ გადაეწყვიტა საკითხი, რომელიც, დამეთახნმებით, საკმაოდ მნიშვნელოვანი საკითხი წყდებოდა ამ დარბაზში. უამრავი ახალი მტკიცებულება წარვუდგინეთ. წარვუდგინეთ 27 პარლამენტარის თანხმობა თავდებთან დაკავშირებით. ასევე გაცხადდა საჯაროდ, რომ აქ არ იყვნენ მხოლოდ და მხოლოდ უმცირესობის პარლამენტის წევრები, აქ იყვნენ უმრავლესობის პარლამენტის წევრები. ჩემთვის როგორც გახდა ცნობილი, კახა ოქრიაშილმა განაცხადა აღნიშნულთან დაკავშირებით. აქ იყო დამოუკიდებელი დეპუტატები, აქ იყო უმცირესობა, უმცირესობის ლიდერი. ქვეყანა, რომელიცაა საპარლამენტო რესპუბლიკა, მისი პარლამენტის წევრები და უმცირესობის ლიდერი უდგებოდნენ თავდებში ბატონ დავითს და აქედან გამომდინარე, მოსამართლე არც კი გასულა სათათბიროდ და მთელი პროცესის განმავლობაში იყო მცდელობა, რომ დროზე მორჩენილიყო პროცესი“,-განაცხადა კონდახაშვილმა სასამართლო პროცესის დასრულების შემდეგ.

მისივე ინფორმაციით, დაცვის მხარე სამართლებრივ ბრძოლას გააგრძელებს.

„ჩვენ, რა თქმა უნდა, გავაგრძელებთ სამართლებრივ ბრძოლას, დაველოდებით დასაბუთებელ გადაწყვეტილებას, რით დაასაბუთებს მოსამართლე, რომ დავით კირკიტაძე მიმალვას აპირებდა, რით დაასაბუთებს მოსამართლე, რომ შესაძლოა, დავით კიკრიტაძემ მოახდინოს მოწმეებზე, მტკიცებულებებზე ზემოქმედება მაშინ, როდესაც პოლიციელთა ჩვენებებია და ყველაფერი ფირზეა აღბეჭდილი. წარმოუდგენელია სამართლებრივი თვალთახედვით“, - აღნიშნა კირკიტაძის უფლებადამცველმა.

გურჯაანის რაიონულმა სასამართლომ „ნაციონალური მოძრაობის“ წევრ დავით კირკიტაძეს აღკვეთის ღონისძიების სახით პატიმრობა შეუფარდა. გადაწყვეტილება გურჯაანის რაიონული სასამართლოს თავმჯდომარემ დავით ნარიმანიშვილმა რამდენიმე წუთის წინ გამოაცხადა.

პროკურატურა დავით კირკიტაძისათვის პატიმრობის გამოყენება მოითხოვა და ეს განმარტა იმით, რომ არსებობს ბრალდებულის მხრიდან მოწმეებზე ზემოქმედების მოხდენის, მიმალვისა და ახალი დანაშაულის ჩადენის საფრთხე.

რაც შეეხება დაცვის მხარეს, ადვოკატმა, გიორგი კონდახიშვილმა განაცხადა, რომ დავით კირკიტაძე თავს დამნაშავედ არ ცნობს და მისი დაკავება პოლიტიკური გადაწყვეტილება იყო.

გადაწყვეტილების გამოცხადებამდე საპარლამენტო უმრავლესობის წევრმა კახა ოქრიაშვილმა დავით კირკიტაძის საქმის განმხილველ მოსამართლეს თხოვნით მიმართა, რომ მას კირკიტაძისთვის აღკვეთის ღონისძიების სახით არა პატიმრობა, არამედ გირაო ან შინაპატიმრობა შეეფარდებინა.

დავით კირკიტაძე ველისციხეში 16 დეკემბერს მომხდარი დაპირისპირების დროს, პოლიციელზე თავდასხმისთვის, ფიზიკური შეურაცხყოფისა და ქონების დაზიანებისთვის სისხლის სამართლის კოდექსის 353-ე პრიმა მუხლით, მოსამართლის განჩინებით დააკავეს.