პოლიტიკა

დავით კეზერაშვილი იყო „ნაციონალური მოძრაობის“ სირცხვილი - ნიკა მელია

„ერთიანი ნაციონალური მოძრაობის“ ერთ-ერთი ლიდერის, ნიკა მელიას განცხადებით, საქართველოს ყოფილი თავდაცვის მინისტრმა დავით კეზერაშვილმა მილიონები „ყაჩაღობით, ქურდობითა და ძარცვით იშოვა“, რომლითაც ახლა პარტია „ევროპულ საქართველოს“ აფინანსებს. ამის შესახებ მან TV პირველის გადაცემა „დიანა ტრაპაიძის დღის ამბებში“ თქვა.

მან დავით კეზერაშვილი „ნაციონალური მოძრაობის“ „სირცხვილი“ უწოდა.

„არ მაქვს მორალური უფლება, ვაკრიტიკო ფარცხალაძე სამართლიანად, როდესაც ვიცი, რომ მილიონებს შოულობს, რადგან ასევე ვიცი, რომ „ნაციონალურ მოძრაობაში“ წლების წინ იყო დავით კეზერაშვილი, რომელმაც სრულიად გაურკვევლად - ყაჩაღობით, ქურდობითა და ძარცვით იშოვა მილიონები, ახლა კი ბიძინა ივანიშვილის მიერ შექმნილ „ევროპულ საქართველოს“ აფინანსებს.

დავით კეზერაშვილი და კიდევ სხვა ადამიანები იყვნენ სირცხვილი „ნაციონალური მოძრაობის“ და ვერავითარ შემთხვევაში ვერ ავიღებ პასუხისმგებლობას დავით კეზერაშვილისნაირ ადამიანებზე. საკუთარი ინტელექტუალური შესაძლებლობებით იშოვა მილიონები? - ის როცა ფინანსურ პოლიციაში მუშაობდა ძარცვავდა ხალხს ისევე, როგორც ფარცხალაძე ძარცვავს დღეს მთელ საქართველოს“, - განაცხადა მელიამ.

მელიას თქმით, კეზერაშვილის გარდა „ევროპულ საქართველოს“ ყოფილი მინისტრის ყველა ბიზნესპარტნიორი და მეწილე აფინანსებს.

„ყველა მისი ბიზნესპარტნიორი, ყველა მისი მეწილე დღეს აფინანსებს ბოკერია-უგულავა-ბაქრაძის პარტიას. თქვენ გგონიათ, რომ ივანიშვილის დასტურის გარეშე ხდება ეს ყველაფერი?“, -აღნიშნა მელიამ.

ენმ-ის ლიდერმა გიგა ბოკერია და გიგი უგულავა მოღალატეები უწოდა და იმედი გამოთქვა, რომ „ნაციონალური მოძრაობა“ მათ გარეშე დაიბრუნებს ხალხის ნდობას.

ანა მებურიშვილი