სამართალი

დაუყოვნებლივ გადააყენონ შოთაძე - ხორავას ქუჩაზე მოკლული დავით სარალიძის მამა მთავარ პროკურატურასთან მივიდა

ხორავას ქუჩაზე მოკლული მოზარდის, დავით სარალიძის მამა, ზაზა სარალიძე უფლებადამცველებთან და მხარდამჭერებთან ერთად მთავარ პროკურატურასთან მივიდა. ის მთავარი პროკურორის, ირაკლი შოთაძის გადადგომას ითხოვს.

„დაუყოვნებლის გადააყენონ, არანაირი შეხვედრა. ვის უნდა შევხდე? ნაძირალა შოთაძეს?“ - აცხადებს სარალიძე ჟურნალსიტებთან.

ის ითხოვს, რომ „დაუყოვნებლის დააკავონ“ მისი შვილის მკვლელები.

ის ასევე ითხოვს, რომ ირაკლი შოთაძესთან ერთად თბილისის პროკურორის მალხაზ კაპანაძის, ასევე პროკურორების - ინა გუგუშვილისა და ზვიად ფხაკაძის პასუხისმგებლობის საკითხი დადგეს.

„დღესვე მიეცნენ პასუხისგებაში შოთაძე, კაპანაძე, გუგუშვილი და ფხაკაძე.

დაუყოვნებლივ ყველა მიეცეს პასუხისგებაში. არაა მნიშვნელობა, დანაშაული დაფარა, დანაშაული ჩაიდინა, დანაშაულის კვალი აურია თუ რაღაც“, - ამბობს სარალიძე.

თბილისში საქალაქო სასამართლოს მოსამართლემ ხორავას ქუჩაზე მოზარდების მკვლელობის საქმეზე გამამტყუნებელი განაჩენი გამოიტანა. მოსამართლემ ერთ-ერთი ბრალდებული დავით სარალიძის მკვლელობის ნაწილში გაამართლა, ხოლო მეორე ბრალდებულს ბრალი გადაუკვალიფიცირა და სარალიძის მკვლელობის მცდელობაში ცნო დამნაშავედ. შესაბამისად, დაუდგენელია, ვინ მოკლა სარალიძე.

ხორავას ქუჩაზე მოზარდების მკვლელობის საქმის 4-თვიანი სასამართლო განხილვა 30 მაისს დასრულდა. ვინაიდან საქმეში არასრულწლოვნები ფიგურირებენ, არასრულწლოვანთა მართლმსაჯულების კოდექსიდან გამომდინარე, სასამართლო სხდომები დახურული იყო.

ხორავას ქუჩაზე ორი მოზარდი 1-ელ დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა, მეორე მოზარდი კი ექიმების მცდელობისა და რამდენიმე ოპერაციის ჩატარების მიუხედავად 2 დეკემბერს საავადმყოფოში გარდაიცვალა.

შინაგან საქმეთა სამინისტრომ, 2 დეკემბერსვე ხორავას ქუჩაზე მომხდარი მკვლელობის ფაქტზე 2001 წელს დაბადებული ერთი არასრულწლოვანი დააკავა და ბრალი განზრახ მკვლელობის მუხლით წაუყენა. მოგვიანებით ძებნა გამოცხადდა კიდევ ერთ არასრულწლოვანზე, რომელსაც ბრალი განზრახ მკვლელობაში დაუსწრებლად წარედგინა. სასამართლომ ორივე ბრალდებულს აღკვეთის ღონისძიების სახით პატიმრობა შეუფარდა. ძებნაში მყოფი არასრულწლოვანი, გ.ჯ. პოლიციას 4 დეკემბერს ჩაბარდა.

გარდა ამისა ხორავას ქუჩაზე, მოზარდების მკვლელობის საქმეზე, პროკურატურამ დანაშაულის შეუტყობინებლობის ბრალდებით პასუხისგებაში 5 პირიც მისცა, რომელთა შორის ორი მოსწავლის მშობელი და შსს-ს ყოფილი თანამშრომელია. პასუხისგებაში მიცემული პირებიდან სამართალდამცველებმა მხოლოდ სამი დააკავეს, ვინაიდან 5 პირიდან ორზე არასრულწლოვანთა მართლმსაჯულების კოდექსი ვრცელდება.

თბილისის საქალაქო სასამართლომ სამ ბრალდებულს აღკვეთის ღონისძიების სახით პატიმრობა შეუფარდა, ერთს - გირაო, ხოლო ერთი ბრალდებული გადაეცა მშობლის - დედის მეთვალყურეობის ქვეშ.