კომენტარი

დასანანია, რომ ირაკლი კობახიძემ პირველი პოლიტიკური ნაბიჯი პარტიული, თუ ვიწრო მიდგომებიდან გამომდინარე გადადგა - ფიქრია ჩიხრაძე

საქართველოს პრეზიდენტის მრჩევლის, ფიქრია ჩიხრაძის განცხადებით, როგორც ჩანს, მოქმედი ხელისუფლების მიერ შექმნილი კომისია იმავე პრაქტიკით იმუშავებს, როგორც ეს წინა ხელისუფლებების დროს იყო.

ამის შესახებ ჩიხრაძემ საკონსტიტუციო საკითხებზე მომუშავე კომისიის თანათავმჯდომარედ გიორგი მარგველაშვილის არ დანიშვნის კომენტირებისას განაცხადა.

„მთავარი ამოცანა იყო, რომ საკონსტიტუციო პროცესი, რომელიც არის განზრახული, ყოფილიყო მაღალი სანდოობის და მაღალი ლეგიტიმაციის მქონე. აქედან მომდინარეობდა პრეზიდენტის შეთავაზება ამ პროცესთან დაკავშირებით. ძალიან დასანანია, რომ ის გადაწყვეტილება, რომელიც მმართველმა გუნდმა მიიღო და დღეს გახდა საზოგადოებისთვის ცნობილი, იმ კითხვის ნიშნებს კიდევ უფრო აჩენს, იმ ეჭვს, რომელიც აქამდეც არსებობდა საკონსტიტუციო პროცესისადმი, უფრო აღრმავებს და ის პრაქტიკა, რომელიც არსებობდა მანამდე, წინა ხელისუფლებების პერიოდში, სამწუხაროდ, როგორც ჩანს, იმავე პრაქტიკით გაგრძელდება ეს საქმიანობა“,-განაცხადა ჩიხრაძემ.

ფიქრია ჩიხრაძის თქმით, დასანანია, რომ ირაკლი კობახიძემ პირველი პოლიტიკური ნაბიჯი პარტიული, თუ ვიწრო მიდგომებიდან გამომდინარე გადადგა.

„ძალიან დასანანია,ამავე დროს, რომ პარლამენტის თავმჯდომარემ, ახალგაზრდა პოლიტიკოსმა, პირველი სერიოზული პოლიტიკური ნაბიჯი გადადგა არა ფართო პოლიტიკური კონტექსტის გათვალისწინებით, არამედ საკმაოდ ვიწრო, პარტიული, თუ ფორმალისტული მიდგომებიდან გამომდინარე“,-აღნიშნა ჩიხრაძემ.

შეგახსენებთ, რომ რამდენიმე კვირის წინ, პრეზიდენტი გამოვიდა ინიციატივით, რომ საკონსტიტუციო საკითხებზე მომუშავე კომისიის მეტი გამჭვირვალეობისთვის კარგი იქნება, თუ კომისიის თავმჯდომარის თანათავმჯდომარეებად პრეზიდენტი, პრემიერ-მინისტრი და პარლამენტის თავმჯდომარე იქნაბოდნენ არჩეული.

დღეს კი გახდა ცნობილი, რომ კომისიის თავმჯდომარე ირაკლი კობახიძე გახდა.

შესაბამისი განცხადება, პრესკონფერენციაზე თავად პარლამენტის თავმჯდომარემ გააკეთა.

მონიკა დავლიანიძე