პოლიტიკა

დარწმუნებული ვარ, რომ ამ არჩევნების ასეთ დონეზე ჩატარება სათანადოდ დაფასდება ჩვენი მეგობრების მიერ - გიორგი კვირიკაშვილი

დარწმუნებული ვარ, რომ არჩევნების ასეთ დონეზე ჩატარება სათანადოდ დაფასდება ჩვენი საერთაშორისო პარტნიორების მიერ და ეს იქნება ძალიან დიდი ქულა საქართველოს ევროპული და ევროატლანტიკური ინტეგრაციის პროცესში, - განაცხადა საქართველოს პრემიერ-მინისტრმა, გიორგი კვირიკაშვილმა მთავრობის დღევანდელ სხდომაზე.

გიორგი კვირიკაშვილმა ადგილობრივი თვითმმართველობის არჩევნები კიდევ ერთხელ შეაფასა.

„მინდა ყველას მოგილოცოთ 21 ოქტომბერს ჩატარებული ძალიან მნიშვნელოვანი არჩევნები. ვფიქრობთ, რომ ეს არის დიდი წარმატება ჩვენი ქვეყნისთვის და ქართული დემოკრატიის განვითარების კუთხით კიდევ ერთი მნიშვნელოვანი ნაბიჯი. ძალიან მნიშვნელოვანია, რომ არჩევნები ჩატარდა მშვიდობიან გარემოში, გამჭვირვალე არჩევნები იყო და ყველა საერთაშორისო და ადგილობრივი დამკვირვებლის მიერ შეფასდა, როგორც თავისუფალი და დემოკრატიული“, - აღნიშნა პრემიერმა.

გიორგი კვირიკაშვილმა აქვე, მადლობა გადაუხადა „ქართული ოცნების“ ყველა მხარდაჭერს, ასევე მათ, ვინც წვლილი შეიტანა არჩევნების ასეთ დონეზე ჩატარებაში, საერთაშორისო სადამკვირვებლო მისიების წარმომადგენლებს, ადგილობრივ დამკვირვებლებს, არასამთავრობო სექტორს და მედიას - კარგი გაშუქებისთვის.

„მე ვფიქრობ, რომ ყველამ დაინახა განსხვავება... თითოეული ახალი არჩევნები ჩვენს ქვეყანაში არის კიდევ უფრო გამჭვირვალე, კიდევ უფრო დემოკრატიული. ყველაზე მნიშვნელოვანია, რომ ჩვენმა გუნდმა ჩაატარა მომავალზე ორიენტირებული, პროგრამაზე ორიენტირებული წინასაარჩევნო კამპანია და საერთოდ, ამ არჩევნების პროცესში გაცილებით უფრო ნაკლები იყო სიძულვილის ენა, რაც ვფიქრობთ, ძალიან მნიშვნელოვანია ჩვენი ქვეყნის მომავალი განვითარებისთვის. გილოცავთ ყველას, დარწმუნებული ვარ, რომ ამ არჩევნების ასეთ დონეზე ჩატარება სათანადოდ დაფასდება ჩვენი მეგობრების მიერ, ჩვენი საერთაშორისო პარტნიორების მიერ და ეს იქნება ძალიან დიდი ქულა საქართველოს ევროპული და ევროატლანტიკური ინტეგრაციის პროცესში“, - განაცხადა პრემიერ-მინისტრმა.