პოლიტიკა

დარწმუნებული ვარ, ნინო გვენეტაძე თავს კომფორტულად ვერ გრძნობდა - ბექა ნაცვლიშვილი

საპარლამენტო უმრავლესობის წევრის, ბექა ნაცვლიშვილის შეფასებით, საქართველოს უზენაესი სასამართლოსა და იუსტიციის უმაღლესი საბჭოს თავმჯდომარემ ნინო გვენეტაძემ თანამდებობა იმის გამო დატოვა, რომ თავს არაკომფორტულად გრძნობდა.

„მე არანაირი ინფორმაცია არ მქონდა, მაგრამ ნინო გვენეტაძე ვერ გრძნობდა თავს კომფორტულად, დარწმუნებული ვარ. ერთმანეთის მეგობრები არ ვართ, მიუხედავად იმისა, რომ ადრე კოლეგები ვიყავით, უნივერსიტეტში ერთად ვმუშაობდით, მაგრამ რამდენჯერაც შევხვედრივარ, განცდა მქონდა იმისა, რომ კომფორტულად ვერ გრძნობდა თავს“, – განაცხადა დეპუტატმა.

კითხვაზე, შესაძლებელია თუ არა, უკავშირდებოდეს გვენეტაძის გადადგომის გადაწყვეტილება დეკანოზ გიორგი მამალაძის საქმეს, როდესაც უზენაესმა სასამართლომ არ მიიღო წარმოებაში აღნიშნული საქმე, ბექა ნაცვლიშვილი პასუხობს, რომ ამაზე ინფორმაცია არ აქვს.

ამასთან, მისი თქმით, იუსტიციის უმაღლეს საბჭოს ფრაქციამ ერთხელ მიმართა შრომით დავებზე მოსამართლეების გამოყოფის საკითხზე, თუმცა, არანაირი პასუხი არ მიუღიათ.

„ერთი შემთხვევა იყო, ჩვენ მივმართეთ იუსტიციის უმაღლეს საბჭოს, რადგან ოთხი მოსამართლე გამოჰყვეს კომერციულ დავებზე, შრომით დავებზე ორი მაინც გამოეყოთ, რაც მსგავსი ტიპის დავებზე გადაწყვეტილებების მიღებას დააჩქარებდა, მაგრამ როდესაც მივმართეთ ფრაქციამ, იქიდან პასუხიც არ მიგვიღია, შემდეგ პირად საუბარში ვკითხე ნინო გვენეტაძეს და მიპასუხა, არ ვიციო. მივხვდი, რომ მთლად კომფორტულად არ გრძნობდა თავს იმ ადგილას, სადაც იყო. ამ პატარა შეხვედრამ ჩემზე ასეთი შთაბეჭდილება დატოვა“, – განაცხადა დეპუტატმა.

გარდა ამისა ნაცვლიშვილმა იუსტიციის უმაღლეს საბჭოში მიმდინარე პროცესები უარყოფითად შეაფასა.

„ძალიან უარყოფითია ჩემი შეფასება, მაგრამ რა წვლილი აქვს ნინო გვენეტაძეს ამაში, ხელეწიფებოდა თუ არა ამ მდგომარეობის გამოსწორება მას და ასე შემდეგ, ამაზე მსჯელობა ცოტა რთულია ჩემთვის“, – განაცხადა დეპუტატმა.

როგორც უზენაესი სასამართლოს პრესსამსახურის მიერ გავრცელებულ ინფორმაციაში წერია, ნინო გვენეტაძის გადადგომის მიზეზი გახდა ჯანმრთელობის მდგომარეობა და საზღვარგარეთ რამდენიმეთვიანი მკურნალობის საჭიროება.