პოლიტიკა

დარღვევები იყო უპრეცედენტო - უჩა ნანუაშვილი „ციანიდის საქმეზე“

დღეს ე.წ. „ციანიდის საქმის“ დასკვნითი სხდომა მიმდინარეობს. სახალხო დამცველის, უჩა ნანუაშვილის შეფასებით, პროცესის დახურვის საჭიროება არ იდგა. ომბუდსმენმა აღნიშნა, რომ „ციანიდის საქმეში“ უპრეცედენტო დარღვევები დაფიქსირდა, რაც იქნება მითითებული სახალხო დამცველის აპარატის დასკვნაში. ანგარიში რამდენიმე დღეში გამოქვეყნდება.

„ვერ დავინახეთ საჭიროება, რომ ეს პროცესი სრულად ყოფილიყო დახურული. რამდენიმე – 1 ან 2 სხდომა იყო ისეთი, სადაც გარკვეული ინფორმაციის გამო სხდომის დახურვა შესაძლოა, ყოფილიყო მიზანშეწონილი, მიუხედავად იმისა, რომ იყო ძალიან დიდი საზოგადოებრივი ინტერესი. სამწუხაროდ, სხდომები დაიხურა, რამაც გარკვეული პრობლემები შექმნა დაკავების პირველივე დღიდან. დარღვევები იყო უპრეცედენტო. ჩვენ ამაზე დეტალურად ვისაუბრეთ დასკვნაში, რომელიც რამდენიმე დღეში გამოქვეყნება. იმედი მაქვს, რომ სასამართლო გაითვალისწინებს ყველა იმ ხარვეზს და დარღვევას, რაც დაკავების დღიდან იყო და განაჩენი იქნება შესაბამისად სამართლიანი“, - განაცხადა ნანუაშვილმა სასამართლო სხდომის დაწყების წინ.

„ციანიდი საქმის“ სასამართლო განხილვა 4 თვის განმავლობასი მიმდინარეობდა. დღეს გახდება ცნობილი, როდის გამოიტანს მოსამართლე ბესიკ ბუგიანიშვილი განაჩენს.

ანა მებურიშვილი