პოლიტიკა

დამკვირვებლების ინფორმაციით, მთაწმინდის საარჩევნო უბანზე მარკირებული ამომრჩევლის მიერ ხმის მიცემის ფაქტი დაფიქსირდა

მთაწმინდის მე-4 ოლქის მე-4 საარჩევნო უბანზე კომისიის წევრებს და კომისიის თავმჯდომარეს შორის სიტყვიერი დაპირისპირება მოხდა. კამათი მარკირებული ამომრჩევლის საარჩევნო უბანზე დაშვებამ გამოიწვია.

დამკვირვებლის განცხადებით, კომისიის თავმჯდომარემ იმ მოქალაქეს მისცა ხმის მიცემის უფლება, რომელიც უკვე მარკირებული იყო.

„ორ თითზე ჰქონდა მარკირება, გავაბრუნეთ. მეორეჯერ მობრუნდა და გამოატარეს, მე გასული ვიყავი ყუთზე, ვრეკავდი მძღოლთან. გამოვყევი ამას, აქ იდგა კაცი სიით და იმას ეუბნება გავაკეთე, ძმაო და გავიდა,“ - ამბობს ერთ-ერთი დამკვირვებელი.

კამათის და დაპირისპირების გამო რამდენიმე წუთის განმავლობაში ხმის მიცემის პროცესი შეწყვეტილი იყო, თუმცა, მოგვიანებით ის განახლდა.

როგორც დამკვირვებლები ამბობენ, სამმა მოქალაქემ, რომლებმაც მარკირება უკვე ჰქონდათ, ხმა მაინც მისცეს.

თავსი მხრივ, მთაწმინდის მე-4 საარჩევნო უბნის კომისიის თავმჯდომარემ ბრალდებას უარყო და აღნიშნა, რომ მას არ დაუფიქსირებია, მსგავსი ფაქტი.