სამართალი

დადგინდა, რომ ნამდვილი მკვლელები გარეთ არიან - ბრალდებულის ადვოკატი

ამ განცხადებით სასამართლომ ცალსახად განაცხადა, რომ არ ვიცით ვინ მოკლა დავით სარალიძე, - განაცხადა საქმეში ერთ-ერთი ბრალდებულის ადვოკატმა ირაკლი ჩომახაშვილმა.

მისი თქმით, მისი დაცვის ქვეშ მყოფს ბრალად სწორედ დავით სარალიძის მკვლელობა ედებოდა, თუმცა ის ამ ნაწილში გამართლდა.

ადვოკატის განმარტებით, სასიკვდილო ჭრილობები მისი დაცვის ქვეშ მყოფს მოკლულისთვის არ მიუყენებია.

„დაუდგენელია გამოძიებით ვინ მიაყენა დავით სარალიძეს სასიკვდილო ჭრილობები, ეს იყვნენ მთავარი მოწმეები თუ სხვები. გამოძიება არ არის სრულად და ობიექტურად ნაწარმოები. დადგინდა, რომ ნამდვილი მკვლელები გარეთ არიან,“- განაცხადა ირაკლი ჩომახაშვილმა.

როგორც ადვოკატმა აღნიშნა, სასამართლომ მისი დაცვის ქვეშ მყოფს მუხლი გადაუკვალიფიცირა და განზრახ მკვლელობის ნაცვლად, დამნაშავედ სცნო განზრახ მკვლელობის მცდელობაში.

ჩომახაშვილის განცხადებით, მისთვის გაუგებარია ამ მდგომარეობიდან როგორ დაიხსნის პროკურატურა თავს, რადგან დადგინდა, რომ მტკიცებულებები არის გაყალბებული.

მისი თქმით, საქმეში ჩართული ყველა გამომძიებლის და პროკურორის წინააღმდეგ უნდა დაიწყოს გამოძიება.