პოლიტიკა

ჩვენთვის მიუღებელია, კონსტიტუციის ცვლილება მოხდეს პიროვნული დამოკიდებულების გამო - ეკა მიშველაძე

საქართველოს პრეზიდენტის პრესსპიკერი, ეკა მიშველაძე გამოეხმაურა ფრაქცია „ქართული ოცნების“ თავმჯდომარის, მამუკა მდინარაძის განცხადებას, რომ შატო მუხრანში გამართულ პარტიულ შეკრებაზე განიხილეს 2018 წელს საპრეზიდენტო არჩევნების არაპირდაპირი წესით ჩატარების ვარიანტი.

მიშველაძის თქმით, საკონსტიტუციო ცვლილებები პიროვნულ სიმპათია-ანტიპათიას არ უნდა ეყრდნობოდეს.

„ჩვენთვის მიუღებელია, კონსტიტუციის ცვლილება მოხდეს კონკრეტული სიმპათიის ან ანტიპათიის, პიროვნული დამოკიდებულების გამო“, - განაცხადა მიშველაძემ სამშაბათის ტრადიციულ ბრიფინგზე.

პრეზიდენტის პრესსპიკერმა აღნიშნა, რომ პრეზიდენტი და მისი ადმინისტრაცია განაგრძობს კონსულტაციებს საკონსტიტუციო ცვლილებების პროექტზე. მიშველაძის თქმით, მნიშვნელოვანია, კონსტიტუცია მაქსიმალური კონსესუსის საფუძველზე იყოს მირებული.

„ასევე გაცნობებთ, რომ კონსტიტუციის გადასინჯვის პროცესთან დაკავშირებით, პრეზიდენტი და მისი ადმინისტრაცია განაგრძობენ კონსულტაციებსა და შეხვედრებს პოლიტიკურ პარტიებთან და სამოქალაქო საზოგადოებასთან. ჩვენთვის მნიშვნელოვანია, რომ კონსტიტუციის მიღება მოხდეს მაქსიმალური კონსესუსის საფუძველზე, რაც ნებისმიერი კონსტიტუციის - ქვეყნის მთავარი დოკუმენტის უმთავრესი არსია. ამასვე ადასტურებს ვენეციის კომისიის რეკომენდაციაც.

სწორედ პროცესის ღიაობა და მასში საზოგადოების, პარტიების და სამოქალაქო სექტორის ფართო ჩართულობა უზრუნველყოფს კონსესუსს. შესაბამისად, ჩვენ ვაგრძელებთ შეხვედრებს და კონსულტაციის გამართვის შეთავაზება არსებობს მმართველ პარტიასთან მიმართებაშიც", - განაცხადა მიშველაძემ.

ანა მებურიშვილი