პოლიტიკა

ჩვენთან დეველოპერები მაოხრებელი „ცეხავიკები“ არიან, მათი ხელშემწყობი და ზურგის გამმაგრებელია კი ქალაქის მერი -ალეკო ელისაშვილი

სამოქალაქო მოძრაობის დამფუძნებლის, ალეკო ელისაშვილის განცხადებით, თბილისის მერმა, კახა კალაძემ არ შეასრულა დაპირება, რომ გენერალური გეგმა პირველი იანვრიდან ამოქმედდება.

„ძალიან კარგად მახსოვს თბილისის მერის განცხადება ზაფხულში, როცა მან საჯაროდ დადო პირობა, რომ გენგეგმა დამტკიცდებოდა საკრებულოს მიერ შემოდგომაზე და 2019 წლის პირველი იანვრიდან ის ამოქმედდებოდა. რამდენიმე დღეში ახალი წელია, საკრებულოს გენგეგმა არ დაუმტკიცებია და ის შესაბამისად, ვერც ამოქმედდება. ქალაქის მერის მხრიდან ეს არის კიდევ ერთი შეუსრულებელი დაპირება", - განაცხადა ელისაშვილმა.

ელისაშვილის თქმით, ამ ყველაფრის უკან დეველოპერები და თბილისის მერია დგას.

„დეველოპერებს ყელში აქვთ გაჩხერილი გენერალური გეგმა. ჟვანიას ქუჩაზე, ნინოშვილის ქუჩაზე გენგეგმა პირდაპირ მიუთითებდა, რომ უნდა გაკეთებულიყო რეკრეაციული ზონა, პარკები, სკვერები, ან ლანდშაფტი დარჩენილიყო ხელშეუხებელი. მაგრამ ჟვანიას ქუჩაზე ფერდობი მოჭრეს და უზარმაზარი კორპუსი შენდება, ნინოშვილზე, სადაც ერთ დროს დიდი სტადიონი იყო, კორპუსების აშენებას აპირებენ. აი, ამიტომ აჩერებენ გენგეგმას რეალურად. ამას ხელს უწყობს მერი და დეველოპერები.

დეველოპმენტი განვითარებას ნიშნავს, მაგრამ ჩვენთან დეველოპერები მაოხრებელი „ცეხავიკები“ არიან. მათი ხელშემწყობი და ზურგის გამმაგრებელია ქალაქის მერი, რომლის ძალისხმევითაც არ ხდება გენგეგმის მიღება. როგორც ჩანს, სარგებელი აქვს მერსა და მის გარშემო მყოფ ხალხს. სხვაგვარად უნდა ხვდებოდე, რომ ქალაქს სკვერი უფრო სჭირდება, ვიდრე დამატებით 20 კორპუსი“, - განაცხადა ელისაშვილმა.