პოლიტიკა

ჩვენმა კლიპმა პოლიციაში ვიღაცები გააღიზიანა - გიორგი ქებურია

ჯგუფ „ბირჟა მაფიის“ წევრის, გიორგი ქებურიას განცხადებით, მას აქვს ინფორმაცია „აჭარანეთიდან“, რომ მათმა კლიპმა „tsl შავი ზედა“ პოლიციაში ვიღაცები გააღიზიანა.

„ინფორმაცია მაქვს, რომ დარეკეს „აჭარანეთში“ და გამოხატეს გაღიზიანება. კლიპში გერბი დაფარა „აჭარანეთმა“, პოლიციელი - მე და მგალობლიშვილმა დავფარეთ, არ გვინდოდა სიტუაციის გამწვავება, რადგან ვიღაცის გაღიზიანება გამოიწვია, მაქსიმალურად დავიზღვიეთ თავი“, - განაცხადა ქებურიამ.

ქებურიამ დაკავების დეტალებზეც ისაუბრა. რეპერის თქმით, მისთვის ნარკოტიკი არ ჩაუდიათ, მაგრამ საქმე ნარკოტიკის შენახვის ბრალდებით მაინც გააფორმეს.

ქებურიამ არ გამორიცხა, რომ ზეწოლა იყო განხორციელებული მსახიობ გიორგი გაგუაზე, რომელმაც კლიპში პოლიციელი ითამაშა.

„ნარკოტიკი ჩემთვის ფიზიკურად არ ჩაუდიათ, საქმის საბუთების შევსებისას გაფორმდა ასე, მგალობლიშვილს კი ფიზიკურად ჩაუდეს. როგორც მახსოვს, საქმეში ფიგურირებს შვიდი პოლიციელი, მაგრამ ამ საქმის უკან ვინ დგას და რამდენი ადამიანია, არ ვიცი. ამოცნობას რაც შეეხება, ცოტა გამიჭირდება, რადგან სათვალე ჩამომართვეს და მხედველობის პრობლემა მაქვს, მაგრამ აუცილებლად ამოვიცნობ ამ ადამიანებს. რაც შეეხება მსახიობ გიორგი გაგუას მიმართვას ბოდიშთან დაკავშირებით, მივხვდი, რომ მასზეც არანაკლები ზეწოლა იყო განხორციელებული“,- განაცხადა ქებურიამ.

ქებურიას თქმით, პოლიციელების ამოცნობაზე მას არავინ დაკავშირებია, მიუხედავად იმისა, რომ მან პროკურატურას მიაწოდა ინფორმაცია იმ სამართალდამცავების შესახებ, ვინც რეპერების საქმეში მონაწილეობდნენ.

რაც შეეხება რეპერ „მასტერის“ დაკითხვას, ქებურიამ განაცხადა, რომ „მასტერსა“ და კიდევ რამდენიმე მეგობარს უამბო, რომ კლიპმა პოლიციელების გაღიზიანება გამოიწვია.

ანა მებურიშვილი