პოლიტიკა

ჩვენი საქმიანობა ოთხ ძირითად პრინციპზე იქნება აგებული - ირაკლი მექვაბიშვილი

პარლამენტში საპარლამენტო უმცირესობასა და გენერალური აუდიტორის თანამდებობაზე წარდგენილ კანდიდატს ირაკლი მექვაბიშვილს შორის შეხვედრა მიმდინარეობს, რომელზეც მექვაბიშვილი საპარლამენტო უმცირესობას სამომავლო გეგმებს და ხედვებს აცნობს.

როგორც მექვაბიშვილმა ჟურნალისტებს შეხვედრის დაწყებამდე განუცხადა, გენერალურ აუდიტორად არჩევის შემთხვევაში, მისი საქმიანობა ოთხ ძირითად პრინციპზე იქნება აგებული.

„ეს არის ობიექტურობა, დამოუკიდებლობა, პროფესიონალიზმი და საჯაროობა. სამსახური ტექნოლოგიურად უნდა განვითარდეს. მისი საქმიანობა უნდა იყოს პრევენციული ხასიათის და არა რაიმე სადამსჯელო სტრუქტურა. თუმცა, თუკი ვნახავთ, რომ კანონთან რაიმე შეუსაბამობაა, ამას ძალიან მყისიერი და ადეკვატური შეფასება და რეაგირება მოყვება. მნიშვნელოვნად მიმაჩნია ჩვენი რეკომედაციების საფუძველზე პარლამენტმა მოახდინოს რეაგირება და დაწესდეს მკაცრი მონიტორინგი ჩვენი რეკომენდაციების შესრულებაზე“,- განაცხადა ირაკლი მექვაბიშვილმა.

რაც შეეხება შესაძლო საკადრო ცვლილებებს, მექვაბიშვილმა აღნიშნა, რომ გენერალურ აუდიტორს აქვს საკადრო გადაწყვეტილებების მიღების უფლება, რასაც საჭიროების შემთხვევაში გააკეთებს.

მონიკა დავლიანიძე