პოლიტიკა

ჩვენი საპრეზიდენტო კანდიდატის დაყენებით უფრო გახურდებოდა სიტუაცია და შეიძლება სხვა მიმართულებით წასულიყო - კახა კალაძე

ვის დაუჭერს მხარს „ქართული ოცნება“ ჯერ კიდევ გადაწყვეტილი არ არის, - განუცხადა ჟურნალისტებს თბილისის მერმა, კახა კალაძემ.

მისი თქმით, მმართველი გუნდი გადაწყვეტილებას მსჯელობის შემდეგ მიიღებს, თუმცა კალაძის განმარტებით, მხარდაჭერას პარტია მხოლოდ დამოუკიდებელ კანდიდატს გამოუცხადებს.

რაც შეეხება პარტიულ კანდიდატს, დედაქალაქის მერის თქმით, ,,ქართულ ოცნებას“ ამ არჩევნებში საკუთარი კანდიდატი იმ მიზეზით არ ჰყავს, რომ ახალი პრეზიდენტის უფლებამოსილებები შემცირებულია.

„ესეც იყო ერთ-ერთი არგუმენტი. ეს ინსტიტუტი ჩვენს ქვეყანაში ძალიან ძლიერი ინსტიტუტი იყო. თუნდაც ავიღოთ გამსახურდია, შევარდნაძე, სააკაშვილი, მარგველაშვილიც კი ეცადა ამ ინსტიტუტის გაძლიერებას სხვადასხვა ატრიბუტებით, თუნდაც ავლაბრის რეზიდენციაში შესვლით. თუმცა, ჩვენი დღევანდელი კონსტიტუციური მოწყობა საპარლამენტო რესპუბლიკაა და შესაბამისად, კონსტიტუციას პატივი უნდა ვცეთ. მთავარია პარლამენტი, ცენტრალური ხელისუფლება, პრეზიდენტი წარმომადგენლობითია.

ჩვენი კანდიდატის დაყენებით უფრო გახურდებოდა სიტუაცია და შეიძლება სხვა მიმართულებით წასულიყო“, - განაცხადა კალაძემ.