პოლიტიკა

ჩვენი პოზიცია გვექნება შემუშავებული, როცა ცვლილებათა პაკეტს გავეცნობით - ანა დოლიძე

საქართველოს პრეზიდენტის საპარლამენტო მდივანი ანა დოლიძე საკონსტიტუციო კომისიის სამუშაო სხდომას ეხმაურება, სადაც პრეზიდენტის უფლებამოსილებების შესაძლო შეზღუდვებს განიხილავენ.

დოლიძის თქმით, პრეზიდენტის ადმინისტრაცია თავის პოზიციას მაშინ გაახმაურებს, როცა ცვლილებათა პროექტს გაეცნობა.

„ვადევნებთ თვალყურს ყველა საკითხს. კომისიაში დღესდღეობით შესულია უამრავი ინიციატივა და საკითხი და ჩვენ მიგვაჩნია ჩვენ ფუნქციად, რომ ვიყოთ ინფორმირებული, რა საკითხების განხილვა მიმდინარეობს იქ იმიტომ, რომ ეს სახელმწიფოებრივი მნიშვნელობის საკითხია. როგორც კი დაიწყება საკითხების დავიწროება, ანუ უკვე შეხება გვექნება კონკრეტულ ტექსტთან, კონკრეტულ ცვლილებების პროექტთან, ბუნებრივია, რომ ჩვენ უკვე ახლოს დავინტერესდებით და უკვე გვექნება შემუშავებული ჩვენი პოზიცია,“ - აცხადებს ანა დოლიძე.

შეგახსენებთ, რომ ახლა საპარლამენტო კომისიის თემატური ჯგუფის სხდომა მიმდინარეობს, სადაც განიხილავენ პრეზიდენტისა და მთავრობის უფლებამოსილებების გამიჯვნას. პრეზიდენტის წარმომადგენელი სამუშაო ჯგუფის სხდომას არ ესწრება.

ანა მებურიშვილი