პოლიტიკა

ჩვენი პოლიტიკური მდგომარეობა თამამი გადაწყვეტილების მიღების საშუალებას არ გვაძლევს - მამუკა მდინარაძე იერუსალიმის სტატუსზე

ფრაქცია „ქართული ოცნების“ თავმჯდომარის, მამუკა მდინარაძის განცხადებით, იერუსალიმის სტატუსთან დაკავშირებით საქართველოს კონსულტაციები სჭირდება საერთაშორისო პარტნიორებთან.

რაც შეეხება ქართული დელეგაციის მიერ გაეროს რეზოლუციის კენჭისყრაზე დაუსწრებლობას, მდინარაძემ განმარტა, რომ ქვეყნის მდგომარეობა არ უშვებს თამამი გადაწყვეტილების მიღების საშუალებას.

„ჩვენი პოლიტიკური მდგომარეობა იმის საშუალებას არ გვაძლევს, რომ თამამი გადაწვეტილებები მივიღოთ. მეტი დაფიქრება და საერთაშორისო პარტნიორებთან მეტი კონსულტაცია გვჭირდება. ჩვენი მსგავსი პატარა ქვეყნისთვის ამის შემდეგ გადაწყვეტილების მიღება საუკეთესო გამოსავალია. ჩვენ საკითხების უმრავლესობას სტრატეგიულ პარტნიორებს ხშირად ვუთანხმებთ“, -აღნიშნა მდინარაძემ.

გუშინ გენერალურმა ასამბლეამ 128 ხმით დაუჭირა მხარი რეზოლუციას, რომლითაც მოითხოვს აშშ-სგან, უკან წაიღოს თავისი გადაწყვეტილება, რომ იერუსალიმი ისრაელის დედაქალაქია. წინააღმდეგ გამოვიდა 9 ქვეყანა: გვატემალა, ისრაელი, მარშალის კუნძულები, პალაუ, ტოგო, მიკრონეზია, ნაურუ, ჰონდურასი და აშშ. 35-მა ქვეყანამ თავი შეიკავა კენჭისყრისას. საქართველოს დელეგაცია სხდომას არ დასწრებია.

აშშ-ის პრეზიდენტმა დონალდ ტრამპმა იერუსალიმი ისრაელის დედაქალაქად 6 დეკემბერს აღიარა. მისი გადაწყვეტილებით, აშშ-ის საელჩო თელ-ავივიდან „წმინდა ქალაქში“ უნდა გადავიდეს.

ანა მებურიშვილი