პოლიტიკა

ჩვენი პოლიტიკის ერთადერთი გზავნილი გახლავთ მშვიდობა - მამუკა ბახტაძე სერგეი შამბას განცხადებაზე

„ერთადერთი უალტერნატივო შეთავაზება საქართველოს ოკუპირებულ ტერიტორიებზე მცხოვრები ჩვენი მოქალაქეებისთვის არის ევროპული ტიპის სახელმწიფოს ჩამოყალიბება“, – ასე გამოეხმაურა საქართველოს პრემიერ-მინისტრი მამუკა ბახტაძე ოკუპირებული აფხაზეთის ყოფილი ე.წ. პრემიერ-მინისტრის, სერგეი შამბას განცხადებას, რომ დროა, სოხუმმა თბილისთან დიალოგი დაიწყოს.

ბახტაძემ აღნიშნა, რომ საქართველოს მთავრობის პოლიტიკის ერთადერთი გზავნილი არის მშვიდობა.

„ჩვენი პოლიტიკის ერთადერთი გზავნილი გახლავთ მშვიდობა. აქვე ჩვენ არაერთხელ აღვნიშნეთ, რომ ერთადერთი უალტერნატივო შეთავაზება ჩვენი მოქალაქეებისთვის, რომლებიც ცხოვრობენ საქართველოს ოკუპირებულ ტერიტორიებზე, გახლავთ ევროპული ტიპის სახელმწიფოს ჩამოყალიბება, სადაც დაცულია ყველა პიროვნების ინტერესი და ღირსება, სადაც ყველას აქვს საშუალება, მოახდინოს საკუთარი ნიჭისა და პოტენციალის რეალიზება.

ეს გახლავთ ჩვენი მხრიდან ერთადერთი და უალტერნატივო შეთავაზება ჩვენი მოქალაქეებისთვის, რომლებიც დღეს ცხოვრობენ საქართველოს ოკუპირებულ ტერიტორიებზე“, – განაცხადა პრემიერმა.

შამბამ რუსულ რადიოსადგურ „Эхо Москвы“-სთან საუბარში განაცხადა, რომ ქართველებს მტრებად არ მიიჩნევს. მან აღნიშნა, რომ თბილისთან დიალოგის დაწყება შესაძლებელია.

„მე ვიყავი პირველი, ვინც დაიწყო საუბარი, რომ რაღაცნაირად უნდა დალაგდეს დიალოგი და დავფიქრდეთ ერთობლივ მომავალზე, იმ გაგებით, რომ ჩვენ ვართ მეზობელი ერები. არა მარტო ჩვენსა და საქართველოს შორის - მეზობელი ევროპული ერები ერთმანეთს ოდესღაც ეომებოდნენ. მაგრამ მერე მოდის დრო, როცა საჭიროა ურთიერთობების დალაგება. ვფიქრობ, რომ ახლა შესაძლებელია ასეთი დიალოგის დაწყება საქართველოსთანაც“, -თქვა შამბამ.