პოლიტიკა

ჩვენ თვის ბოლომდე პოზიციები უნდა შევაჯეროთ ნარკოპოლიტიკის კანონპროექტთან დაკავშირებით - ირაკლი კობახიძე

საქართველოს პარლამენტის თავმჯდომარის, ირაკლი კობახიძის თქმით, ნარკოპოლიტიკასთან დაკავშირებით უმრავლესობაში საბოლოო პოზიციები მაისის ბოლომდე შეჯერდება.

კობახიძემ აღნიშნა, რომ კონსესუსის მიღწევა შესაძლებელია.

„ჩვენ თვის ბოლომდე პოზიციები უნდა შევაჯეროთ კანონპროექტთან დაკავშირებით, ამისთვის დაახლოებით ორი კვირა გვაქვს. არის აზრთა სხვადასხვაობა დეტალებთან დაკავშირებით, თუმცა მიზანი საერთოა, მიზანი არის ნარკომოხმარების შემცირება საქართველოში, ასევე ჰუმანური პოლიტიკის წარმოება და ამ საერთო მიზნებიდან გამომდინარე, არსებობს კონსენსუსის მიღწევის რესურსი. მთავარია, აქტიურად ვიმუშაოთ და ვფიქრობ, ორი კვირის განმავლობაში, შევძლებთ კონსენსუსის მიღწევას გუნდის შიგნით“, – განაცხადა კობახიძემ.

მან დაამატა, რომ რაციონალური გადაწყვეტილებაა მისაღები.

„მთავარია, მივიღოთ რაციონალური გადაწყვეტილება, ეს არის ყველას საერთო მიზანი. მთავარია ჩამოვაყალიბოთ სწორი კანონპროექტი, სადაც ასახული იქნება აღნიშნული მიზნები. ეს არის მთავარი ამოცანა. დარწმუნებული ვარ, კონსულტაციების სწორად წარმართვის შემთხვევაში, ეს მიზანი მიღწეული იქნება“,-თქვა კობახიძემ.