პოლიტიკა

ჩვენ წელს ვზეიმობთ ჩვენთვის ყველასთვის საამაყო უნივერსიტეტის დაარსების 100 წლის იუბილეს - გიორგი კვირიკაშვილი

2018 წელი ძალიან ღირსეულად უნდა აღინიშნოს, რათა ქვეყნის ფარგლებს გარეთ ბევრმა ადამიანმა გაიგოს იმ მდიდარი ტრადიციების შესახებ, რომელიც ჩვენს ქვეყანას გააჩნია, - განაცხადა პრემიერ-მინისტრმა გიორგი კვირიკაშვილმა მთვრობის დღევანდელ სხდომაზე.

გიორგი კვირიკაშვილმა ივანე ჯავახიშვილის სახელობის თბილისის სახელმწიფო უნივერისტეტის 100 წლის იუბილეს გამოეხმაურა.

„მოგეხსენებათ, რომ ჩვენ წელს ვზეიმობთ ჩვენთვის ყველასთვის საამაყო უნივერსიტეტის დაარსების 100 წლის იუბილეს. ეს საქართველოსთვის არ გახლავთ მხოლოდ და მხოლოდ საგანმანათლებლო ინსტიტუტი, ეს იყო ძალიან მნიშვნელოვანი კულტურული კერა და ასევე ეროვნული მუხტისა და ეროვნული თვითმყოფადობის შემანარჩუნებელი ინსტიტუცია, რომელმაც საქართველოში თაობები გაზარდა, რომლებმაც შეინარჩუნეს ის ეროვნული მუხტი, რომელმაც დღეს ჩვენ მოგვიტანა დამოუკიდებელი ქვეყანა. სწორედ ამ უნივერსიტეტის კერაზე გაიზარდა არაერთი სასიქადულო მამულიშვილი, რომელმაც საქართველოს სახელი ქვეყნის ფარგლებს გარეთ გაიტანა. ჩვენ ვამაყობთ ჩვენი უნივერსიტეტით. ძალიან მნიშვნელოვანია, რომ ეს იუბილე იუნესკოს ეგიდით ტარდება. მნიშვნელოვანია, რომ 147 ქვეყნიდან ჩამოვა დელეგაციები, როგორც სამეცნიერო წრეებიდან, ასევე სხვადასხვა ხელისუფლების წარმომადგენლები და ჩვენთან ერთად იზეიმებენ ამ უდიდესი ტრადიციების მქონე უნივერსიტეტის 100 წლის იუბილეს“, - განაცხადა კვირიკაშვილმა.

პრემიერის თქმით, წელს ასევე ვზეიმობთ დამოუკიდებელი რესპუბლიკის გამოცხადების 100 წლის იუბილეს.

„მთელი წლის განმავლოაბში გაგრძელდება საზეიმო ღონისძიებები და კულმინაცია იქნება, რა თქმა უნდა, 26 მაისს, როდესაც ჩვენთან ჩამოვლენ სხვადასხვა მეგობარი ქვეყნის ხელისუფლების წარმომადგენლები და ვფიქრობთ, რომ 2018 წელი ძალიან ღირსეულად უნდა აღინიშნოს, რათა ქვეყნის ფარგლებს გარეთ ბევრმა ადამიანმა გაიგოს იმ მდიდარი ტრადიციების შესახებ, რომელიც ჩვენს ქვეყანას გააჩნია“, - განაცხადა კვირიკაშვილმა.