სამართალი

ჩვენ საკონსტიტუციო სასამართლოს საქმიანობაში არ ვერევით - ირაკლი კობახიძე

„ქართული ოცნების“ აღმასრულებელი მდივნის ირაკლი კობახიძის განცხადებით,მმართველი გუნდი საკონსტიტუციო სასამართლოს საქმიანობაში არ ერევა, შესაბამისად მისი პრეროგატივაა, თავმჯდომარის არჩევა.

ამის შესახებ კობახიძემ რუსთავი 2-ის ეთერში, საკონსტიტუციო სასამარრთლოს თავმჯდომარედ ზაზა თავაძის არჩევის საკითხის კომენტირებისას განაცხადა.

ჟურნალისტის კითხვაზე იმის შესახებ, რომ კონსტიტუციონალისტები მიიჩნევენ, რომ ზაზა თავაძის არჩევის შემთხვევაში, ხელისუფლების მხრიდან საკონსტიტუციო სასამართლოზე ზეწოლა გაძლიერდება, ირაკლი კობახიძემ აღნიშნა, რომ ზოგადად ასეთი შეფასება არასწორია.

„ჩვენ საკონსტიტუციო და ზოგადად სასამართლოს საქმიანობაში არ ვერევით. სასამართლოს პრეროგატივა არის თავმჯდომარის არჩევა, ჩვენ ჩვენი კომპეტენციის ფარგლებში ვითანამშრომლებთ სასამართლოსთან და ვითანამშრომლებთ საკოსნტიტუციო სასამართლოს ახალ თავმჯდომარესთან. ზოგადად, არასწორია ასეთი შეფასებების გაკეთება, მაშინ დაასახელონ ამ ადამიანებმა ის ვისი არჩევის შემთხვევაში პროცესი სხვანაირად წავიდოდა. ეს არის აბსოლუტურად საფუძველს მოკლებული განცხადებები“,-აღნიშნა კობახიძემ.

კითხვაზე, თუ როგორ შეაფასებდა იგი, საკონსტიტუციო სასამართლოს ახალ თავმჯდომარეს, ირაკლი კობახიძემ განაცხადა, რომ „არასწორი იქნება პოლიტიკური პარტიის წარმომადგენლის მხრიდან სასამართლოს თავმჯდომარის შეფასება და მისი დახასიათება“.

მონიკა დავლიანიძე