სამართალი

ჩვენ მოვიგეთ საქმე, რომელიც ეხება ვანო მერაბიშვილის პოლიტიკურ პატიმრად ცნობას - ოთარ კახიძე

ვანო მერაბიშვილის ადვოკატმა და „ევროპული საქართველოს“ წევრმა, ოთარ კახიძემ, შს ყოფილი მინისტრის საქმეზე სტრასბურგის სასამართლოს დიდი პალატის გადაწყვეტილებასთან დაკავშირებით საგანგებო ბრიფინგი გამართა.

კახიძის განმარტებით, პალატამ ძალაში დატოვა ევროკონვენციის მე-18 მუხლის დარღვევა, რითაც ცნობს შს ყოფილ მინისტრს პოლიტიკურ პატიმრად. მან მოითხოვა ხელისუფლებისგან, რომ ქვეყნის იმიჯის გაფუჭების თავიდან ასაცილებლად გაათავისუფლოს მერაბიშვილი.

„ადამიანის უფლებათა ევროპული სასამართლოს დიდმა პალატამ ძალაში დატოვა მანამდე სექციის მიერ მიღებული გადაწყვეტილება ვანო მერაბიშვილის საქმეზე და ჩვენ მოვიგეთ საქმე, რომელიც ეხება ვანო მერაბიშვილის პოლიტიკურ პატიმრად ცნობას. სასამართლომ ძალაში დატოვა მე-18 მუხლის დარღვევა - ეს არის ცნობილი მუხლი, რომლითაც ცნობილი პატიმრების - იულია ტიმოშენკოსა და იური ლუცენკოს საქმეები იყო წარმართული და მე მინდა, მივმართო საქართველოს ხელისუფლებას, თუ სურთ, რომ მოახდინონ ზიანის მინიმალიზება, რომელიც მიადგება ჩვენი ქვეყნის იმიჯს ამ უპასუხისმგებლო გადაწყვეტილებით, რაც მათ მიიღეს მერაბიშვილის დაპატიმრებით, დაუყოვნებლივ მიიღონ გადაწყვეტილება ვანო მერაბიშვილის გათავისუფლების თაობაზე“, - განაცხადა კახიძემ.

ადვოკატის განმარტებით, დიდი პალატის მიერ მიღებული გადაწყვეტილების გასაჩივრება შეუძლებელია, რადგან ის წარმოადგენს სტრასბურგის სასამართლოს ბოლო ინსტანციას. კახიძემ აღნიშნა, რომ ეს შემთხვევა უნდა იყოს გაკვეთილი ხელისუფლებისთვის, რომელმაც ვანო მერაბიშვილთან ერთად სხვა პოლიტპატიმრები უნდა გაათავისუფლოს.

ადამიანის უფლებათა ევროპული სასამართლოს დიდმა პალატამ შს ყოფილი მინისტრის, ვანო მერაბიშვილის საქმეში ევროკონვენციის 2 მუხლის დარღვევა დაადგინა.